Maunongon Ang Gugma - Gula 20

“Mao kana. Gipasanginlan ko nga maoy naglugos ug nagpatay sa kaugalingon kong hinigugma, si Gemma Roca. Influential nga pamilya ug suod nga higala sa usa ka politiko ang nangusog aron mabilanggo ako, si Mr. Ludo Mercado.”

“Nga-nganong nanginlabot man kanang giingon mong Mr. Ludo Mercado sa imong kaso?” Kabanay ba niya ang rape victim?”

“Dili. Pero may sukaranan ang iyang paningkamot nga mabilanggo ko tungod kay ang iyang anak nga si Brandon mao man ang matuod nga responsable sa krimen.”

“U-unsa?”

“Mao kana ang matuod. Si Brandon Mercado ang matuod nga naglugos ug nagpatay sa akong hinigugma. May nakakita kaniya sa iyang paghimo sa krimen apan nagpakahilom lang tungod sa kahadlok. Gibayran nila ang silingan sa biktima nga nakasaksi sa krimen aron kini motak-om. Abusado kaayo ug adik si Brandon.”

“Pero nganong ikaw man ang napasanginlan?”

“Niadtong higayona miadto ko sa gipuy-an ni Gemma. Domingo kadtong adlawa ug nagsabot kami nga manuroy. Apan mao na lamay akong naabtan ang akong hinigugma nga naguhayguhay ang sapot ug wala nay kinabuhi. Ug tungod sa gahom sa sapi sa mga Mercado, ako na hinuon maoy giduot nga maoy responsable sa krimen.” -- Sumpayan pa