Duhay uyab

Dear Tita Salie,

A pleasant day to you, Tita. Just call me Aries, single. Naa koy duha ka uyab nga maoy nakapalibog kanako karon kay na-inlove ko nilang duha.

Ang usa nako ka uyab taga dinhi lang sa Sugbo. Pinangga kaayo nako siya ug pinangga sab ko niya. Apan sa dihang nilarga ko sa Negros duna koy nakaila. Naunsa ba nga na love at first sight man ko niya. Ug wa ko masayod nga pareha diay ming duha, na love at first sight pod siya. Apan nahibal-an namo nga paryente pa diay mi pero bisan paryente ming duha ako lang gihapon siyang gisugot kay layolayo na man ang among pagkaparyente.

Maong karon naglibog na hinuon ko kun kinsay akong pilion, Tita. Kun ikaw ang naa sa akong dapit kinsa may imong pilion? Kay naglisod gayod ko sa pagpili. Pulos sila akong gihigugma ug mahadlok ko nga masayop sa akong desisyon maong mangayo ko sa imong hunahuna. Daghang salamat and more power. -- Aries

* * *

Dear Aries. Bagay gayod kanimo ang kanta ni Ogie Alcasid nga “Bakit ngayon ka lang dumating” o kaya ang kanta nga “Sana dalawa ang puso ko.” Lisod gayod tinuod kun mahigugma ta sa duha ka tawo. Ilabi na kun pareho silang importante kanato ug pareho silang walay kabilinggan sa kinabuhi. Kun puyde pa lang angkonon silang duha wala untay problema.

Sa karon giusab na ang balaod sa simbahan puyde na kaslon bisan third degree cousin. Tungod kini sa isyu nga daghan kaayong nagpuyopuyo ug dili magpakasal kay paryente pa sila. Busa wala gayod untay problema ang duha ka tawo nga imong gihigugma. Imo silang gihigugma tungod kay mga maayo gayod silang tawo. Tungod kay pareho silang maayong tawo pareho sila nga imong gihigugma.

Ang gugma anaa lang sa kasingkasing. Mao nga naglibog ka kay ang kasingkasing dili maantigo maghunahuna kay ang iyang trabaho igo lang sa pagbati. Ang atong utok ang motrabaho kun perti na sa paghunahuna. Busa, this is the moment nga atong papilion ang atong utok alang sa atong paghimo og desisyon. Paandara ang “heart ug mind” sa imong pagpili kun kinsa kanilang duha. Kinahanglan silang duha ang molihok aron wala kay basulan sa imong hukom. Ayaw pasagdi nga ang dughan lang ang imong pasagdan kay dili kini makakita sa kamatuoran. -- Tita Salie