Fly-by-night nga klinika

“Ayayyyy! Haskang sakita gyud!” Nagpamugong sa nawong ug naglimbaglimbag si Don Fernando sa kasakit sa iyang nawong karong buntaga. Wa siya mahimutang ug nag-alindasay nga naglingkod sa terasa sa iyang mansiyon. Overlooking unta iyang mansion sa siyudad kay nia matarok sa taas nga bungtod sa Talamban.

Apan di niya madayeg o maaninaw ang kanindot sa kalikupan ug panahon karong buntaga. Nihubag iyang nawong ug daw niburot iyang ulo. Katulo pil-a ang gidak-on sa iyang ulo tungod sa hubag sa iyang nawong.

Naputos pa sa bendahe iyang nawong. Igo lang gibinlan og mga lungag ang para sa mga mata, ilong ug baba. Sa niaging tulo ka adlaw, nagpa-plastic surgery si Don Fernando aron mausab iyang hitsura.

Usa ka drug lord si Don Fernando. Naarestar siya sa PDEA. Nag-atubang og daghang kaso sa pagpayuhot sa ginadiling drugas. Kay daghag kuwarta, nakapiyansa. Gustong moeskapo ngadto sa Borneo. Di moatubang sa kaso. Nagpausab sa iyang nawong. Nagpa-plastic surgery. Kay way mopasapol og trabaho sa pagretoke sa iyang nawong sa mga inilang plastic surgeon, nigamit og fly-by-night nga klinika. Usa ka klinika nga way klarong lisensiya. Ang mga doctor, wa say klaro kun may lisensiya ba. Kasagaran mga intern sa mga inilang ospital. Ug nag-sideline sa pagkaplastic surgeon. Di pa haniti o eksperto sa maong natad sa surgery.

Kay dinalian iyang gusto, nitanyag ang Don nga mobayad siya bisa’g pila. Dili eksperto ang nag-opera. Dili pa espesyalista. Wa matarong og sterilized ang mga gamit. Na-infected ang nawong ni Don Fernando. Mas dako pa gani iyang nabayad kay sa kasagarang presyo ni Dr. Belo.

Wa pa gyud himangdi sa mga plastic surgeon nga fly-by-night, nga may diabetes si Don Fernando. Wa nialim ang samad. Pun-an pa nga kagawon ang mga gamit. Ginanaan ang hubag ug mga samad. Nagangrina ang operasyon sa nawong.

“Unsa gani mahitabo nako, nasayod na mo’g unsay inyong buhaton sa mga nag-opera nako!” niya pa ngadto sa iyang pangabaga nga si Roy Zapanta nga nagbarog sa iyang duol. Niyango lang si Roy nga nagping-it sa kalooy niya sa iyang amo.

Gipangita sa pamilya sa Don ug sakop sa sindikato ang duha ka plastic surgeon nga way lisensiya nga nag-opera sa drug lord. Dangtag tulo ka adlaw nanglutaw ilang lawas sa sapa sa Mananga. May mga samad agi sa mga bala sa pusil ilang mga lawas. Seguradong paagi sa pag-salvage, modus sa mga sindikato. Nailhan ang mga lawas nga sila si Edward Cuenca ug Wilben Duhig mga gradwado sa Maritrans Medical School.

Gimantala sa tanang mga mantalaan nga WANTED si Don Fernando Lapaz. Nga human makapiyansa, wa na nitambong sa mga kaso. Nahanaw sama sa bula. Way usa sa miyembro sa iyang pamilya o sindikato nga nitug-an nga namatay siya sa plastic surgery nga di maayong pagkatrabaho.

Naglibog si Ritche Tibon nga nagbarog duol sa newsstand sa skywalk sa Talamban. Nabasa niya ang balita mahitungod sa wanted nga drug lord ug sa mga biktima sa salvaging.

“Duna ba kaha ni koneksiyon?” sukot niyas iyang kaugalingon. Siya ang ahente sa PDEA nga maoy ni-arestar sa drug lord. (Katapusan)