Maunongon Ang Gugma

Gula 19

“Malagmit may nagpuyo niining maong payag kaniadto,” tubag ni Jeffrey. “Tingalig milain na sa laing dapit tungod kay gihasol ug gitugaw na sa mga NPA.”

“M-may mga NPA diay dinhing dapita?”

“Tingali.”

Inanay nga nabatyagan ni Danica nga komportable na siya sa pagpakig-uban kang Jeffrey. Iya na man gud nga nasuta nga dili gayod kini daotang tawo.

“K-kinsa ka ba gayod, Jeffrey?” Nakalighot ang maong pangutana sa mga ngabil ni Danica. “Nganong gipangita ug gigukod ka man sa mga polis?”

Wala motingog si Jeffrey. Nakita ni Danica nga mihun-ag ang kasubo sa panagway niini.

“Unsay salaod nga imong nahimo nga gigukod ka man sa mga awtoridad?” Miusab pagpangutana si Danica.

“Usa ako ka biktima sa pasangil,” laktod nga tubag ni Jeffrey.

“U-unsay buot mong ipasabot?” Mikunot ang agtang ni Danica.

“Usa ako ka kanhi polis nga karon nahimong usa ka fugitive,” mipasabot ang lalaki. “Bug-at kaayo ang kaso nga akong giatubang, usa ka krimen nga wala gayod nako mabuhat.”

“U-unsang matanga sa kaso?”

“Rape with murder.”

“H-ha?” -- Sumpayan pa