"Nabusug"

Gula 2

Dihang didto na sila sulod sa kwarto sa hotel si Orchids ug JO1 Rosvel, nagtinutokay silang duha. Diha pa nasuta ni Orchids kun nganong wala siya makabalibad sa hangyo ni Rosvel nga sila magdeyt kay ambongan g’yud diay ang jailguard.

Misamot og kalukmay si Orchids tungod sa mapinanggaon kaayong tinan-awan ni Rosvel kaniya. Human kasirad-i ni Rosvel ang pultahan sa hotel, mapinanggaon niyang gigakus si Orchids.

Daw nangurug ang kaunoran ni Orchids kay ingon sa may pagtan-aw siya sa batan-ong jailguard. Misukol siya ni Rosvel sa pagpahigayon og mainitong romansa hangtud nga pareho na silang walay mga sapot.

Lalim kaayo ang gibati ni Orchids dihang gihapuhap ni Rosvel ang tibuok niyang kalawasan ug gipatagamtam kaniya ang nagpungasi nga mga hawok.

Mitabikong pag-ayo si Orchids kang Rosvel dihang dungan sila nga misangko sa kinatumyan sa ilang kalipay.

“Naibog kaayo ko nimo Orchids kaniadto pa apan wala ko magsilbi kay nasayud ko nga gimintin ka ni Major Navarez. Asa dapit ang inyo kay ihatud tika Orchids? Gipangutana ni JO1 Rosvel ang dalaga.

Nalipay kaayo ang mga ginikanan ni Orchids nga nakagawas na siya sa bilanggoan. Pipila ka adlaw ang milabay, misugod dayon si Orchids sa pagpangita’g trabaho.

Giagni si Orchids sa iyang amiga nga mobalik pagtrabaho sa bar, apan ingon sa wala na siya’y gusto nga mag-dancer. Misuroy si Orchids sa iladong downtown department store ug nahimamat niya si Elsie.

Disinti kaayo tan-awon si Elsie ug gibana-bana ni Orchids nga sakop kini sa dili ordinaryo nga pamilya. Giimbitar siya niini og pagpangaon sa kan-anan nga nahimutang sa kinaibabwan sa department store.

Nasabtan niya nga may sigi nga nagkontak niini. “Sori day ha, dunay gustong makigkita kanako,” matud ni Elsie samtang abtik kaayo nga nagkitiw-kitiw ang mga tudlo sa pag-text.

“Unsa bay imong trabaho karon Orchids?” gipangutana ni Elsie ang dalaga. “Wala pa lagi Day.” Gitug-anan ni Orchids si Elsie sa iyang kaagi. Nahinuklog si Elsie nga naminaw sa pagsaysay ni Orchids kaniya.

“Ako Day, pait usab kaayo ang akong kahimtang mao nga naninguha na lang g’yud ko aron nga mabuhi ug karon, miarang-arang og gamay ang akong kahimtang human ko nagpasakop sa grupo nga Nabusug,” matud ni Elsie. (Sumpayan)