Gula 73
“N-nanuroy mi si Jack, Pa,” hinay nga pasabot ni Alexa ngadto sa amahan.
Si Colleen nga nagpamati lang sulod sa iyang kuwarto gikulbaan na pag-ayo. Nabalaka siya kun unsay buhaton sa ilang amahan ngadto sa iyang maguwang.
“Nanuroy mo niarong orasa sa kagabhion?” Sikmat sa amahan.
Wala motingog si Alexa. Si Colleen nga nagpamati nakapanglad-ok sa iyang laway. Misamot ang gibati niyang kakulba.
“Pagtarong gyud sa imong pagka-babaye, Alexa,” nagkanayon ang ilang papa Omer. “Ug ayaw pasobrahi ang imong pagsalig nianang way batasan mong hinigugma kay tingalig magmahay ka sa kapulihay.”
Ug sa misunod nga mga gutlo, nabati ni Colleen nga nagpaka-paka na ang baba sa ilang amahan. Gisermonan niini’g maayo si Alexa. Sukad masukad sa kinabuhi ni Colleen, mao pa siya makadungog nga nakabungat ang ilang amahan og hait nga mga pulong ngadto sa iyang maguwang.
Gileksiyon pag-ayo si Alexa sa ilang amahan.
Maoy pagkahuman sa ikaduhang klase ni Colleen sa buntag. Vacant niya ang sunod nga period. Nakahunahuna siyang mogawas una’g makadiyot sa unibersidad nga iyang gitunghaan aron modalikyat sa labing duol nga shopping mall. May libro siyang gustong paliton. -- Sumpayan pa