"Nabusog"

Naghinuktok si Orchids atubangan sa bilanggoan. Alang kang Orchids ang Cebu City jail nahimo na nga kabahin sa iyang kasaysayan. Gilingi niya ang gamay’ng kwarto kilid sa opisina sa warden nga didto gitugyan niya ang iyang lawas kang Major Navarez.

Unya may miabot nga sakyanan sa Bureau of Jail Management and Penology nga nagkarga og mga priso. Nasabtan ni Orchids nga gikan sa korte ang maong mga priso nga mitambong sa husay sa ilang kaso.

Usa sa mga gwardya milingi kaniya… dayon miduol. “Orchids, laya ka na diay? Dismiss na diay ang imong kaso?”

Nahinumdom si Orchids nga si JO1 Rosvel diay ang miduol kaniya nga makausa ka higayon maoy mi-escort kaniya atul sa arraignment sa iyang kaso didto sa hukmanan.

“Gawasnon ka na man g’yud Orchids, pwede’g makigdeyt ko nimo? Ayaw ko’g balibari, nasayud ko sa inyong sitwasyon kaniadto ni Major Navarez kay usa ko sa iyang bak-ap,” matud ni JO1 Rosvel nga nagpahiyom.

Wala dayon makatingog si Orchids. “Sige, huwata ko ha? Mananghid usa ko kadiyot sa among supervisor nga duna koy lakaw,” ni JO1 Rosvel pa nga nagdali nga misulod dayon sa prisohan.

Alang kang Orchids, maayo ra usab kay bakikaw kaayo nga mag-inusara ra siya nga mobiya sa maong dapit ug magsakay sa mga motorsiklo nga habal-habal. Wala tuod magdugay si JO1 Rosvel, mibalik kini dayon nga wala na mag-uniporme.

“Duna ko’y motor, ako usa nga kuhaon ha?” paspas ang mga lihok ni JO1 Rosvel nga daw nagdali. Mibalik si JO1 Rosvel nga nag-drive na’g motor ug gipaangkas dayon si Orchids.

“Asa diay ta?” nangutana si Orchids dihang naglugsong na ang gisakyan nilang motor paingon sa Langub sa Guadalupe. “Mo-check-in usa ta’g kadali,” matud ni JO1 Rosvel. Wala gayud masayop si Orchids sa tumong sa gwardya kaniya.

Wala madugay, gisubay nila ang gamay’ng karsada kilid sa Kapitolyo ug nabantayan ni Orchids nga mipahinay si JO1 Rosvel dihang nagkaduol na sila sa usa ka hotel. “Anhi lang ta dinhi,” ni JO1 Rosvel pa nga mi-parking sa iyang motor.

Nahibulong si Orchids kay pagtangka pa lang nila sa pultahan, mipahiyom na ang nagbantay sa front desk ug miabi-abi ni JO1 Rosvel, dayon mitunol sa yawe alang sa ilang kwarto.

“Higala nako ang tag-iya niining hotel kay duna siya’y pirmi nga bisitahan sa bilanggoan mao nga wala ko’y bayad dinhi,” matud sa jail guard. Misulod sila sa Room 202. (Sumpayan)