Gula 17
Inanay na karon nga nakombinser si Danica nga dili daotang tawo si Jeffrey. Apan nganong gipangita man kini sa mga tinugyanan sa balaod? Kining maong pangutana maoy naghawid sa hingpit niyang paghatag sa iyang pagsalig ngadto sa lalaki.
Mihigda si Danica sa salog nga kawayan sa payag. Iyang giunlanan ang bag ni Jeffrey. Gipiyong niya ang iyang mga mata kay gusto na siyang matulog.
Lawom nang gabii apan wala pa makatulog si Danica. Nagpabilin siyang nagmata ug nagpaniid sa palibot. Maoy sentro sa iyang pagpaniid si Jeffrey nga atua sa tugkaran sa payag.
Apan nabati na niya ang kusog nga hagok ni Jeffrey nga didto maggikan dapit sa may hagdanan sa payag. Nakatulog na diay kini.
Nahingpit ang iyang pagtuo nga wala gayoy plano si Jeffrey sa pagbuhat og daotan ngadto kaniya. Siya diay tingali ang hugaw og hunahuna.
Apan kinsa man sab gud ang dili magduda sa pagkatawo ni Jeffrey? Gidagit gud siya niini. Gihimong hostage aron makalikay kini sa mga tinugyanan sa balaod nga buot modakop niini. -- Sumpayan pa