Ang sinugdanan anaa sa kataposan

Gula 71

Karon lang nasayod si Colleen nga wala diay makagusto ang iyang Papa Omer kang Jack nga mao nay bag-ong boyfriend sa iyang ate Alexa.

“Magbantay lang gyud sila nako,” may tuno sa pagbahad ang pulong sa iyang amahan.

Lapas na ang alas diyes sa kagabhion apan wala pa gayod mahiuli si Alexa. Nabalaka nag maayo si Colleen. Nasuko na pag-ayo ang ilang amahan. Kaganina ra kining namatikdan ni Colleen nga nagpaso-paso sa sala nga nagpaabot sa iyang ate Alexa.

Gi-text ni Colleen ang cellphone ni Alexa apan wala kini mo-reply kaniya. Iya kining gimiskolan pero dili makontak. Unattended or out of coverage area kuno, matud pa. Misantop sa hunahuna ni Colleen nga tingalig nag-lowbat ang cellphone sa iyang maguwang.

Wala mahimutang si Colleen samtang naghigda siya sulod sa iyang kuwarto. Ang iyang mga dalunggan nagpaningod sa palibot. Ang iyang amahan wala gayod mobiya sa sala, naghulat nga mahiuli si Alexa.

Sa higayon nga makadungog si Colleen og andar sa sakyanan, iyang paminawon kun mohunong ba kini sa tungod sa ilang balay. Namasin siya nga ang sakyanan na ni Jack ang nahiabot. Apan nahisagmuyo lang usab siya dayon sa higayon nga mosaylo sa ilang balay ang sakyanan nga moagi. -- Sumpayan pa