Gula 16
Wala madugay, nagtuyoktuyok ang aso sa palibot sa payag ug inanay usab nga nawagtang ang mga lamok. Kay may signal sa maong dapit, si Jeffrey nagpunay og text sa cellphone niini.
Wala na mobalik pagsaka si Jeffrey sa payag. Naglingkod kini sa ikaduhang ang-ang sa hagdanan. Gibantayan niini nga dili mapawong ang daob.
Si Danica nga nagpabilin didto sa sulod sa payag hilom nga naniid sa mga lihok sa lalaki. Wala siya’y namatikdan nga mga makapabalakang lihok ni Jeffrey nga maoy timailhan nga may daotan kining gilaraw kaniya.
“Katulog na diha,” giingnan siya ni Jeffrey sa dihang mitikyop na sa hingpit ang kagabhion. “Ugma mosayo ra ba kita’g lugsong ngadto sa patag.”
Wala siya motingog.
Si Jeffrey nagpabilin lang gihapon didto sa tugkaran sa payag.
“Aron dili ka maglisod pag-ayo,” ni Jeffrey pa, “unlani lang kanang akong bag. Wala may mabuak niana. Sirad-i usab kanang pultahan.”
Nakabatyag si Danica og diyotay’ng relief sa gisulti ni Jeffrey. Ingon sa nakasabot ang lalaki nga dili siya komportableng matulog uban niini. Sa sinultihan ni Jeffrey, iyang nasabot nga dili kini matulog sa sulod sa payag. Adto ra kini sa gawas. Gisirhan niya ang pultahan. -- Sumpayan pa