Gula 70
Wala pa mahiuli si Alexa nga nanuroy uban kang Jack.
Wala magdugay si Brendan sa panimalay nilang Colleen. Dangtan og pipila ka gutlo, nanamilit na kini kaniya ug sa iyang mga ginikanan.
“Hain man diay ang imong ate Alexa?” Gipangutana si Colleen ni Papa Omer niya dihang nakalakaw na si Brendan.
“Mikuyog man to’g panuroy kang Jack,” mubo niyang tubag. “Mas una pa man gani silang nanggikan kay kanamo ni Brendan.”
“Asa man kuno to sila?” Sukit ni Mama Isabel niya.
“Wa man magsulti si Ate,” ni Colleen pa. “Nagdala man to si Jack sa kaugalingon niyang sakyanan.”
“Nahungog na gyud og maayo kanang maguwang mo nianang Jack,” nagkanayon ang iyang amahan. “Ako ra ba...wa gyud ko’y salig nianang lalakiha.”
Wala motingog si Colleen. Nakamatikod siya nga may kasuko nga gilukim ang sinultihan sa iyang amahan. Sukad masukad, karon pa siya makamatikod nga naingon niini si Papa Omer.
Dili pig-otan ang ilang mga ginikanan kun bahin na sa ilang hinigugma. Apan hugot gayod silang gibaoran nga mag-amping sa ilang pagka babaye. Wala usab magpili ang ilang mga ginikanan sa matang sa lalaki nga ilang higugmaon. Bahala’g pobre -- sama kanila -- basta nga kini kasaligan ug buotan. -- Sumpayan pa