Gula 15
“Taga Oslob ka diay?” Laing pangutana ang gipasupot sa lalaki.
“Dili,” ni Danica pa. “May mahinungdanon lang kong tuyo didto.”
Miyangoyango ang lalaki.
“Anhi na lang kita magpalabay sa kagabhion,” nagkanayon si Jeffrey. “Ugma sa buntag, ihatod ko na ikaw sa patag aron makalahos ka na ngadto sa Oslob.”
Wala motubay si Danica. Apan sa hilom nahinangop siya sa gisulti ni Jeffrey nga papaulion na siya niini.
Apan sa laing bahin, may reserbasyon siyang kabalaka. Ugma pa sa buntag siyang papaulion ni Jeffrey. Nagpasabot kini nga mag-uban sila dinhi sa payag sulod sa usa ka gabii nga sila rang duha ug taliwala pa gayod sa dakong lasang. Nabalaka siya nga tingalig unsay buhaton ni Jeffrey kaniya.
Daghan pa ang posibleng mahitabo samtang dili pa matapos ang panag-uban nila ni Jeffrey sa taliwala sa lasang. Tingalig tugkan kini’g sungay ug makahunahuna sa pagpasipala sa iyang pagka babaye. Wala ra ba gyu’y makasanta kang Jeffrey bisan unsay buhaton niini kaniya. Wala usay kuwarto ang sulod sa payag.
Mingitngit na ang palibot si Danica nagpunay og pangdapi kay nagsugod nag pamahit ang mga lamok sa lasang. Mikanaog si Jeffrey sa payag. Naghimo kini’g daob didto sa tugkaran sa payag. -- Sumpayan pa