Gula 14
Hanas kaayo ang mga kamot ni Jeffrey nga miabli sa duha ka lata sa karne norte pinaagi sa jungle knife nga gigunitan niini. Ang usa ka lata gitunol sa lalaki kaniya.
“Mangaon una ta,” agda sa lalaki nga miabli sa plastik nga gisudlan sa tasty bread. “Nasayod kong gigutom ka na. Hapon na karon ug wala pa kita’y paniudto.”
Wala gihapon motingog si Danica. Nakatag-an si Jeffrey nga gigutom na siya. Kaganina rang mihilab ang iyang tiyan apan wala lang siya moreklamo. Pasado alas onse pa sa kaudtohon nga nahitabo ang pag-ikyas nila gikan sa mga polis nga naghimo’g check point ug karon lapas na sa alas kuwatro sa kahaponon.
Mikaon na si Jeffrey. Apan wala pa maggunok si Danica.
“Kaon na,” agda ni Jeffrey. “Wala lagi lumay nang mga pagkaona.”
Mikaon na si Danica. Samtang nagkaon, may mga higayon nga dili niya kalikayan ang pagpasiplat ngadto kang Jeffrey nga nagkamulo usab sa pagkaon. Iyang nabantayan ang kabuotan ug kaaghop sa panagway sa lalaki. Ingon sa dili siya makatuo nga may gibatonan kining cruelty.
“Asa man diay unta ang imong destinasyon kun wala ko pa ikaw i-hostage?” Nangutana si Jeffrey kaniya dihang nahuman na kini’g kaon.
“S-sa Oslob,” mubong tubag sa dalaga.-- Sumpayan