Lawom na ang kagabhion sa dihang nabati ni Lynn ang maanindot nga tingog sa usa ka lalaki nga nangharana kaniya.
“Ang gugmang gibati ko, sa batan-on pa kita. Migamot sa panumdoman ko, bisan sa kadugay na, ang kalimot way gahom sa pagpapas ning tanan.”
“Kaanindot niining tingoga,” matud ni Lynn sa kaugalingon, “Kinsa kaha ron? Akong lili-on diri sa may bintana,” dayon niyang luhod sa may bintana ug giwaling og gamay ang kurtina. “Wa man ko kaila niining tawhana, kinsa kaha ni?” Iyang gitan-aw pag-ayo ang hitsura sa lalaki nga natandangan sa kahayag sa bulan. “Guwapo ra ba apan wa man ko kaila niini,” dayon higda og balik sa lantay.
Samtang naminaw siya sa mananoy nga tingog, gihanduraw ni Lynn ang mga nangagi sa iyang kinabuhi. Kinsi anyos pa lang siya kaniadto apan daghan na kaayo ang mga nangulitawo niya tungod sa talagsaon niyang kabuotan nga giubanan sa diyutay niyang kaanyag.
“Lynn, wa pa gyud kay gisugot sa mga nangulitawo nimo?” Nangutana si Lanie sa iyang higala.
“Wa man koy gusto nila, Day, apan naay akong nagustohan, wa man mangulitawo nako.”
“Kinsa man Lynn?”
“Dah, ang burong nga si Val, igo lang sa pagtan-aw apan wa gyud kasulti.”
“Wa na man god na siya’y ginikanan, guwapo ra ba unta.”
Dugay na kadto, kinsi anyos na ang nakalabay, ug wala na usab si Val sa ilang dapit nga wa nila mahibalo-i kun diin paingon.
Nianang sunod gabii, bisita ni Lynn ang lalaking nangharana sa miaging gabii. Maayo og pamiste ug posturaw kaayo.
“Komosta ka Lynn?” Matud sa ulitawo sa dihang gipadayon siya sa dalaga.
“Maayo man, apan kinsa man to ka, kay wa man ko mahinumdom nga nagkaila ta?”
“Ako si Val, Lynn, ang ulitawong burong nga luyo sa kadako sa gugma niya kanimo, milakaw aron mangita og kaayohan nga ikahalad kanimo.”
“Ha! Ikaw si Val! Sus, kadugay nakong hulat nimo, Val, nabiyaan na lang ko sa biyahi sa paghinulat nimo.”
“Sige lang Lynn, kay di to mao ang biyahi nga atong sakyan. Kining akong gianhi karon mao ang biyahi natong duha, kun mouyon ka.”
“Sus! Wa gyud ko magdahom, Val nga mahinumdom ka pa kanako.”
“Ang kalimot way gahum, Lynn sa pagpapas ning tanan, kay ang gugma nga gibati ko alang da gyud kanimo.”
“Imo na man nang gikanta gabii, Val.” “Ako lang gisubli, Lynn ug kun mahimo, magpakasal ta dayon samtang wa pa ka-larga ang biyahi.”
“Oo, Val, uyon ako,” dayong kapyot ni Lynn sa liog sa lalaki. (Katapusan)