Dear Tita Salie,
Have a nice day, Tita. Just call me Jelai, 24 years of age na ko, and a mother of three kids. Apan wala pa makasal sa amahan sa akong mga anak.
Gusto gayod baya unta namo nga makasal na aron matawag na kami nga minyo. Apan ang kasal anaa ra gayod kanunay sa among hunahuna kay igo ra man kami sa plano.
Excited na usab ang among mga anak nga makasal kami ug nagsige lang intawon sila og imagine nga moapil og paso atol sa among kasal. Apan kutob ra gayod kami sa paghunahuna ug pag-imagine, kay wala man gayod kami kwarta nga magamit unya sa among kasal. Kay kun duna kami’y matigom nga gamay’ng kwarta alang unta sa among kasal magamit gihapon alang sa mga gastosan sa panimalay. Mao nga igo ra gayod kami sa pangandoy.
Unsa may angay namong buhaton, Tita, aron matuman ang among damgo nga makasal na unta? Palihog pasabta. Daghang salamat sa imong pagtagad. -- Jelai
* * *
Good day, Jelai. Daghan kaayo ang mga butang nga gusto unta natong buhaton, apan dili kini mabuhat tungod ra usab kanato. Kaya unta kining himoon apan atong gihunahuna nga kini lisod buhaton.
Wala gayod madayon ang inyong plano nga pagpakasal tungod kay daghan kaayo mo og gihunahuna. Apan ayaw ninyo buhata ang mga butang nga dili pa ninyo makaya. Maoy inyong buhaton ang mga butang nga inyong tan-awon dali rang himuon.
Ang pagpakasal dali ra ninyong mahimo. Tungod kay anaa na ninyo ang tanang lamas nga kinahanglan. Tinuoray mo nga nagkahigugmaay busa puyde ug kaya gayod ninyong magminyo. Ug angayan na usab kamong magminyo kay aduna na moy mga anak.
Kun magpakasal mo dili na kinahanglan mogasto gawas sa mga papelis nga gikinahanglan dad-on. Apan gamay ra kaayo. Puyde mo mag-inquire sa inyong parokya mahitungod sa ilang schedule sa “mass wedding”. Dili kana mobayad og mahal sa simbahan.
Ang pagpakaon sa daghang mga tawo ang dili ninyo kaya tungod kay walay ikagasto. Apan imong hunahunaon nga wala kini kinahanglana. Magdala ka lang og duha ka witness ninyo kuyog ang inyong mga anak igo na aron inyong dawaton ang dugay na ninyong gipangandoy. -- Tita Salie