Priso Kabalyero

Gula 3

Angayan kaayo si Orchids nga naglingkod sa lamesa ug sa nindot nga lingkoranan sa dayong sulod sa opisina ni warden Navarez.

Siya maoy tigtubag sa telepono kun dunay manawag sa warden ug usahay sugoon usab siya ni Major Navarez pagdala sa mga dukomento ngadto sa administrative section.

Pagka alas singko sa hapon, misulod sa opisina sa warden si Leon, ang administrative officer sa bilanggoan. “Uy kaangayan nimo Gelyn nga mahimong sekretarya ni warden.,” ni Leon pa nga nagpahiyom sa pagtangka pa lang niya sa pultahan.

“Orchids na lang ang itawag nako Sir Leon,” ni Gelyn pa. Nagkatawa si Leon nga nakasabot nga gusto si Gelyn nga dili kaayo mainila sa iyang ngalan sa bilanggoan. “Naa ba si warden?” gisukna ni Leon si Orchids apan kalit niini nga gigunitan ug gipig-it ang kamot sa babaye.

“Balik unya’ng taud-taud Leo kay magpapalit ko’g sumsoman nato,” matud sa warden. “Yes Sir.”

“Naandan na namo diri Orchids nga matag Biyernes sa hapon mag-lipay-lipay mi pinaagi sa pag-inum-inom kay agi’g pagwagtang sa kakapoy… pero ang mga on-duty walay labut,” matud sa warden. Taud-taud may nangabot.

Nabantayan ni Orchids nga mga suod sa warden ang nangabut kay midiritso ra kini’g sulod ug milingkod sa lingkoranan atubangan ni Major Navarez. “Gwapa ka man diay og secretary,” nadungog ni Orchids ang gisulti sa usa ka tawo bisan og kini gihinay pagsulti.

“Orchids, hatagi mi’g beer anaa sa ref,” giingnan ni Major Navarez si Orchids. Wala maglangan si Orchids, gituman dayon niya ang sugo sa warden. Nasentro sa panan-aw sa mga bisita ni Major Navarez si Orchids dihang mitindog kini ug mipaingon sa nahimutangan sa ref.

“Paundanga na kana’g duty ang imong secretary Major…Para malingaw ta paapila na og hapi-hapi nato,” matud sa usa ka bisita ni Major Navarez. “Bitaw tuod, sige ubani mi diri Orchids,” matud sa warden. Wala makabalibad si Orchids ug miapil siya sa pakig-inom sa warden ug sa mga bisita.

Dali rang milabay ang mga oras. Nahubog na si Orchids mao nga mihukdong siya sa lamesa sa warden. “Mamauli na mi Major kay katulgon na kana si Orchids,” matud sa mga bisita sa warden nga nagkihat-kihat ug klaro kaayong may gipasabot.

“Sige salamat sa inyong pagbisita, next week na usab,” ni warden pa, dayong sirado sa pultahan sa iyang opisina ug iya kining gi-lock. (Sumpayan)