Maunongon Ang Gugma

Gula 12

Apan wala gayod siya mangahas sa pag-ikyas. Nabalaka siya nga tingali’g masakpan ra siya pagbalik ni Jeffrey kun iya kining buhaton. Tingalig lisodlisoron na hinuon siya niini. Tingalig gaposon na hinuon siya niini aron pagseguro nga dili siya makaikyas. Mao nga wala gayod siya mangahas sa pag-ikyas. Nasayod siyang dili siya magsilbi sa kaabtik ni Jeffrey.

Nagpadayon sila sa paglakaw taliwala sa masiot nga lasang. Managsama silang nagkadusingot na pag-ayo. Kun makaagi sila og hagip-ot kaayong agianan, tabangan si Danica ni Jeffrey pinaagi sa paggunit niini sa iyang kamot. Apan sa hilom, supak sa iyang kabubut-on nga gunitan siya niini. Wala na lang siya mo-ik. Wala na lang magdaghan pag langas.

Dangtan og mga tunga sa oras nilang pagbaktas, nahisangko sila sa tugkaran sa usa ka payag.

Nalibon na ang tugkaran sa payag nga nahitukmaan nila ni Danica ug Jeffrey sa taliwala sa lasang. Nagmingaw ang palibot. Maila nga taudtaod na kining gibiyaan sa tawo nga nagpuyo niini.

Mipaduol sila sa payag. Unya gihinay pagtukmod ni Jeffrey ang pultahan sa payag. Naabli kini.

Kalit lang may mitakandal didto sa sulod. Kalit nga nakasinggit si Danica sa kahikurat dihang milayat ang usa ka iring ihalas gikan sa sulod sa payag nga miagi sa ilang atubangan. Ang mananap midiretso pagsum-ok sa bagang kasagbotan. --Sumpayan pa