Priso kabalyero

Walay pyansa nga girekomendar ang piskaliya aron nga makagawas sa prisohan si Orchids tungod kay kini maoy gilatid sa balaud alang sa madakpan sa pagpamaligya og shabu.

Alang kang Orchids, mora’g mahugno ang kalibutan ngadto kaniya dihang gidala na siya sa bilanggoan. Gisukit-sukit si Orchids sa administrative officer kay kuhaan siya og rekords nga maoy pamaagi kun dunay priso nga bag-ong masulod sa bilanggoan.

Apan kalit may misulod sa administrative office. “Unsa ni siya priso?” nangutana ang tawo nga bag-o lang misulod sa opisina. “Yes Sir, bag-ong pasok,” matud sa tawo nga misukit-sukit kang Orchids.

“Mosugot ka Day og adto ka lang sa akong opisina idistino, tigtubag sa telepono aron dili ka na lang isulod sa selda?” gipangutana si Orchids. “Siya ang among warden Day, si Major Navarez.”

Wala dayon makatubag si Orchids mao nga mitalikod ang warden apan sa wala pa kini mogawas, nagbilin kini og mensahe. “Ipaadto lang ko sa opisina Sards kun ok ra niya nga adto sa opisina madistino.”

“Ok.. humana ko’g kuha’g rekords nimo. Unsay imong hukom? Dawaton nimo ang tanyag ni Sir o adto ka lang sa selda ibutang?” gipangutana sa administrative officer si Orchids.

Sa kahadlok nga adto siya matanggong uban sa daghang mga priso sa selda ilabi na nga makadungog siya og balita kaniadto nga lisud kaayo ang kinabuhi didto sa sulod sa mga selda sa prisohan, nakahukom si Orchids nga dawaton ang tanyag sa warden.

“Sige Sir, dad-a ko sa opisina sa inyong warden,” ni Orchids pa. Samtang sila naglakaw paingon sa opisina sa warden, nakita ni Orchids nga may laing mga priso nga gipasulod sa prisohan… ug usa kanila si Ronald.

Mora’g mibukal ang dugo ni Orchids nga nagtan-aw kang Ronald nga maoy nakaingon nga siya karon napriso kay nadakpan pagpamaligya og shabu bisan og siya wala’y kasayoran sa maong transaksyon.

“Sir, dia ra si Orchids. Ok ra niya nga anhi madistino sa imong opisina,” matud sa admin officer. “Sige biyai ra mi Sards.”

“Unsay imong ngalan?” sa warden pa nga daw pilit kaayo’g tinan-awan kang Orchids. “Gelyn g’yud ang akong ngalan Sir, pero Orchids maoy akong gigamit nga angga.”

May gikontak ang warden sa intercom. “Inig balik ni Lea gikan sa court hearing, dad-a na lang siya diritso sa selda kay si Orchids na ang tigtubag sa akong telepono diri sa opisina.” – Sumpayan