Gula 63
Gidala siya ni Cody ngadto sa foodcourt aron makalingkod sila ug magkasulti sila’g maayo.
“Unsay imong orderon?” Sukit ni Cody.
“No,” mibalibad si Colleen. Salamat na lang. Pero busog pa ko. Bag-o pa kong nangisnak. Gikan ko dinhi. Pagkanaog nako, nakita tikaw nga nagsakay sa escalator paingon sa taas mao nga giagpas ko ikaw.”
“Diay ba?”
Mipatunga kanila ang kahilom.
“N-nasayod na ko sa nahitabo ninyo ni Ate,” ni Colleen maoy mibukas sa topiko nga ilang panagsultihan.
“Gisultihan ka na diay niya?” May kasubo nga milabhag sa panagway sa ulitawo samtang namulong.
“Oo. Nakalitan kaayo ko sa nahitabo labaw na tingali ka?”
“Mao gyud. Sakit kaayo ang iyang gibuhat nako.”
“Ako’y mangayog pasaylo sa gibuhat ni Ate nimo.”
“Ayaw kabalaka, Colleen. Wa ko magbaton og kasilag sa imong maguwang. Gitahod nako ang iyang desisyon. Sakit man tuod kini alang kanako apan kinahanglang dawaton ko ang kamatuoran sa dakong pagpaubos.
“Dalaygon ka gyud, Cody. Buotan ka ug masinaboton.”
Wala motubay si Cody sa iyang gisulti. Miduko kini sa iyang atubangan. Nakahigayon si Colleen sa pagtutok sa ambongang panagway sa ulitawo. Misamot ang iyang kaluoy nga gibati samtang nagtan-aw sa ulitawo nga ingon sa depressed gayod kaayo. -- Sumpayan pa