Gipaandar gilayon sa lalaki ang motorsiklo. Unya gipusil niini ang duha ka ligid sa sakyanan sa kapolisan sa dayon na niining padagan sa motorsiklo. Kusog kaayong mipadagan ang lalaki sa motorsiklo aron mosibat gikan sa mga tinugyanan sa balaod.
Pag-abot nila sa unahan, misimang sila sa dalan paingon sa bukiran nga dapit. Unya pag-abot nila sa laing simangan, miliko na usab sila.
Misamot ang kakuyaw ni Danica tungod kay bisan libaongon na ang dalan nga ilang gisubay, kusog lang gihapon ang pagpadagan sa lalaki sa motorsiklo nga ilang gisakyan.
Hinuon, nabantayan ni Danica nga hanas kaayong momaneho og motorsiklo ang lalaki nga mi-hostage kaniya.
Didto sila mosangko sa dapit nga wala nay karsada. Mao na lay ilang gisubay ang gagmay’ng dalan-dalan hangtod nga nahisangko sila sa tampi sa usa ka sapa. Gipahunong sa lalaki ang motorsiklo.
Si Danica wala’y tingog-tingog. Kinsa ba sad ang ganahang motingog sa iyang kahimtang nga ginerbiyos man siya sa gihimo sa lalaki nga mi-hostage kaniya ug ingon man sa kakusog sa pagpadagan niini sa motorsiklo. Gilubat-lobatan si Danica sa kalisang.
“Sorry kaayo sa nahitabo,” matud sa lalaki nga mikanaog sa motorsiklo apan wala mopalayo kaniya. “Naangin ka hinuon.” -- Sumpayan pa