Ang sinugdanan anaa sa kataposan - Gula 61

Karon nga nagkabulag sila si Alexa ug Cody, dili siya angay nga molaom nga itakli sa lalaki ang gugma niini ngadto kaniya. Dili na siya buot nga mabawo sa ikaduhang higayon. Gawas pa, may Brendan na usab sa iyang kinabuhi.

Kun nahigugma pa si Cody kaniya, kaniadto ra unta kining nangulitawo kaniya. Dili unta ang iyang Ate Alexa maoy pangulitawhan niini. Ug kun mahigugma man pag-usab si Cody, seguradong dili gihapon siya ang babaye nga higugmaon niini. Posible gani nga lakip siya maangin sa kasilag nga hayan gihambin na karon ni Cody batok sa iyang maguwang.

Igsuon gud sila si Alexa! Tingalig mahunahuna ni Cody nga siya ug si Alexa managsama ra. Nga dili kasaligan. Nga dili maantigong motuman og kasabotan. Mao kini ang lintunganay sa kabalaka karon ni Colleen.

Nahasol si Colleen. Mora ba’g lakip siya naapektohan sa pagkabugto sa relasyon ni Cody ug sa iyang maguwang.

Gumikan sa gibating kaluoy ni Colleen kang Cody, nangita siya’g paagi nga magkakita sila. Ang problema kay wala siya’y contact number kang Cody. Na-erase na man gud sa phonebook sa iyang cellphone ang numero sa ulitawo. Iya kining gi-erase sa dihang nasayran niyang nagkahigugmaay na si Cody ug ang iyang Ate Alexa. Kay alang niya, wala nay katarongan nga iya pang i-save sa iyang phonebook ang maong numero. -- Sumpayan pa