“Dos...”
Ang mga polis ingon sa nakasuta nga wala magkomedya ang lalaki. Milunga sila sa pagtion ngadto niini.
“Ilabay kanang inyong armas ngadto sa gawas,” mando sa lalaki nga mi-hostage kang Danica. “Sa gawas ning sakyanan.”
Mituman ang mga polis sa mando sa lalaki.
Dihadiha abtik nga milihok ang lalaki. Hugot kining migunit kang Danica ug gidala siya niini’g pugos pagkanaog sa bus. Mabinantayon kini kaayo. Ang mga mata niini didto ra sa mga polis.
Dihang nakakanaog na sila sa bus, gidala si Danica sa lalaki ngadto sa usa ka motorsiklo nga gi-parking sa unahan.
Si Danica ang unang gipaangkas sa lalaki sa motorsiklo. Supak unta sa iyang kabubut-on apan napugos siya pagtuman sa mando sa lalaki. Nahadlok siya nga masuko ang lalaki kun magsupak-supak siya niini. May dala ra ba kining armas.
Dihang nakaangkas na si Danica, abtik ang lalaki nga miangkas sa iyang luyo. Diha na ang mga polis nga miagpas kanila human makuha pagbalik ang mga armas sa maong mga tinugyanan sa balaod nga gilabay ngadto sa karsada. Gikuyawan si Danica kay tingali’g pusilon sa mga polis ang lalaki ug mapagan siya. -- Sumpayan pa