Gula 2
Nahimuot si Danica sa hilom. Misantop sa iyang hunahuna nga maulawon ang maong lalaki. Posturawo man unta kaayo kini’g barog. Wala sa pamayhon niini ang pagka-maulawon tungod kay bagsik kaayo kining tan-awon. Tipo sa usa ka action star ang bayhon niini. Maong dili makatuo si Danica nga maulawon ang maong lalaki.
Gipasagdan na lang ni Danica ang maong lalaki. Mitan-aw siya sa gawas sa sakyanan. Gilingaw niya ang iyang kaugalingon sa nagkadaiyang talan-awon nga malabyan samtang nagdagan ang bus nga iyang gisakyan.
“Miss,” gisangpit siya sa lalaki dungan ang hinay nga pagkuhit sa iyang kamot.
“Nga-ngano?” Gilingi niya ang lalaki.
Ug sa unang higayon nagkatinutokay sila. Iyang nasuta nga guwapo ang maong lalaki. Ang kidlap sa mga mata niini naghatod og talagsaong kakulba sa iyang dughan.
“A-ang imong pitaka, o,” sa lalaki pa. “Hapit na mahulog.”
Nahatan-aw si Danica sa iyang shoulder bag. Naabli diay ang siper niini ug milugwa ang iyang pitaka. Iyang gibalik pagpasok ang pitaka ngadto sa sulod sa shoulder bag ug gisirado ang siper.
“Thank you,” niya pa nga mitan-aw sa gikatupad nga lalaki.
“You’re welcome,” mipahiyom ang lalaki. -- Sumpayan pa