Gula 6
Giagbayan ni Mr. Beltran si Gelyn ug wala paabota sa manager nga ang iyang empleyada migakus dayon kaniya.
Ang kanhi hilomon ug manggiuwawon kaayo nga Gelyn karon wala nay pupanagana sa iyang mga lihok ngadto sa iyang manager. Siya pa gani ang miuna sa paghawok kang Mr. Beltran. Ang kaparaygon na ni Gelyn inanay nga nakasugnib og kainit ngadto kang Mr. Beltran.
Nagginaksanay silang duha ug nag-ukobay ang masi’g nila ka mga ngabil.Samtang init na kaayo ang ilang pagparayganay ibabaw sa kama, gitagsa-tagsa na ni Mr. Beltran sa pagpanangtang ang salimbong sa kalawasan ni Gelyn. Hangtud nga sa laing higayon, naangkon ni Mr. Beltran ang pagka babaye sa iyang bag-ong HRD manager.
Milabay ang daghang mga adlaw. Ang nahitabo kanila ni Mr. Beltran ug Gelyn didto sa hotel nasundan pa sa makadaghan nga higayon hangtud nga wala g’yud mosipyat ang giingong wala’y aso nga makumkom.
Nabulgar ang ilang relasyon kay nagbunga na ang kinawat-kawat nila nga kalipay ni Mr. Beltran ug Gelyn. Bantang na kaayo sa tanang kawani sa kompaniya nga si Gelyn mosakay na sa kotse ni Mr. Beltran inighuman sa ilang trabaho sa hapon ug daku na usab ang iyang tiyan.
Usa ka hapon gipatawag si Gelyn ni Mr. Beltran. Daw subo kaayo kini og panagway nga naglingkod sa iyang lingkuranan dihang misulod si Gelyn. “Sir, duna kay tuyo nako?” matud ni Gelyn nga mikalma sanglit bildo man ang bungbong sa opisina ug makita sila sa gawas.
“Sa among bag-o pa lang nga tigum sa mga sakop sa Board of Directors niining kompaniya, gihisgutan ang atong relasyon. Miabot na diay kanila ang atong relasyon ug ang presidente sa kompaniya nasabtan nako nga wala malipay,” daw luya ang tuno sa sinultihan ni Mr. Beltran.
Mipauli og sayo si Mr. Beltran. Wala sila magkakuyog si Gelyn sa pagpauli nianang hapona. Wala motubag si Mr. Beltran sa mga text messages ug tawag sa cellphone gikan ni Gelyn.
Pagka-ugma, sayo nga mireport sa opisina si Gelyn sa pamasin nga makasultihanay sila si Mr. Beltran apan dugay nga miabot ang manager nianang buntaga.
Taud-taud, miabot si Mr. Beltran ug midiritso kini pagsulod sa opisina. Gipanid-an ni Gelyn ug nakita niya nga daw nanghipos kini sa iyang mga butang. Unya may miabot nga gisugat sa ubang department head.
“Gelyn, dia si Ma’am, ang presidente niining kompaniya,” usa ka amiga nga kawani ang mipahibalo kaniya. (Sumpayan)