Kapit-patalim

Gula 5

Nagsagol ang gibati ni Gelyn, dunay kalipay ug dunay kakulba.

Nalipay si Gelyn pagkasayud nga i-promote siya pagka full-time nga HRD manager sa ilang kompaniya apan nasagmuyo siya tungod kay nalantaw niya ang panghitabo inigka-gabii nga pahimudsan na usab siya unya ni Mr. Beltran.

“Wala ka ba malipay nga ma-promote ka sa imong katungdanan Gelyn?” Gipangutana sa manager ang dalaga. Igo lang mipahiyom si Gelyn. “Nalipay Sir uy kay dali ra kaayo ko nga na-promote sa akong katungdanan.”

“Natural… imo ang manager mao nga paspas ang imong promotion apan ayaw lang pagpasabot sa imong mga kauban. Adto kita magkita sa lobby sa Waterfront Hotel unyang gabii,” ni Mr. Beltran pa.

Nagdali nga mipauli si Gelyn sa ilang balay aron pahibaw-on ang iyang mga ginikanan sa iyang promosyon. “Mao ba! Salamat kay gidungog gayud ang akong pag-ampo,” matud sa inahan sa dalaga.

Nananghid si Gelyn nga molakaw. Gipasangil ra niya nga bangkahan niya ang iyang mga kauban sa opisina.

Pagsulod ni Gelyn sa lobby sa hotel nakita dayon niya si Mr. Beltran nga didto naglingkod sa usa ka lamesa. Midiritso siya sa pagduol sa iyang manager. “Nakakaon ka na ba?” ni Mr. Beltran pa. “Humana Sir.”

Mitindog si Mr. Beltran human gibilin ang tibuok P500 sa lamesa nga gidat-ogan sa tasa sa giinom niyang kape. Gisunod ni Gelyn ang iyang manager nga klaro kaayo nga nagpaingon sa elevator.

Sulod sa elevator, miparayeg na pagsugod si Gelyn. “Salamat kaayo Sir ha nga gi-promote ko nimo sa katungdanan,” matud ni Gelyn nga mihana paghawok sa manager.

“Ayaw, ayaw paghawok nako dinhi Gelyn kay dunay camera kining elevator ug makita kita sa nagbantay didto sa technical room,” ni Mr. Beltran pa nga abtik kaayo nga nakalikay sa paghawok unta ni Gelyn.

Mihunong ang elevator ug mibukas ang pultahan. “Bisan dinhi dunay mga camera nga gibutang busa dili kita magpakita og mga lihok nga dili maayo. Adto ra ta sa sulod magtagbaw sa atong kaugalingon,” matud ni Mr. Beltran.

Giyawehan ni Mr. Beltran ang pultahan sa kwarto Dayon iyang gi-lock. “Giganahan ko sa paghawok mo unta kanako ganina Gelyn. Sige karon na kini himoa kay dia na kita sa kwarto,” ni Mr. Beltran pa nga abtik kaayong nakahapyod-hapyod sa sampot sa dalaga. (Sumpayan)