Kung ito’y isang panaginip, ayaw ko nang magising! tinagalog ni Dong Awi, human ang panaghalok nilang duha ni Day Onlang, nga nagtampisaw sa dagat ning alas-singkong dako sa kaadlawon.
Diin taob ang dagat nga igong mitabon sa hubo’ng dughan sa dalaga nga mora’g dyosa sa kagwapa, nga dugay na niyang naibgan sa iyang dughan sukad pa pagka-grade one, nga way pagkalawos hangtud karon nga sila usa ka 4th yr. high school.
Wa siya magdahum nga ang kabugnaw sa dagat sa kaadlawon ug ang pagkamalinawon sa palibot karon, maoy mopalukmay sa batuong kasingkasing sa dalaga nga nag-ayad kanunay sa gitanyag niyang gugma,kay maot lagi’ng nawong niya. Ania na karon gigakos na’g hugot sa niwang niyang mga bukton. Nakig-ukobay sa iyang ngabil nga may tahi hangtod siya nakaihi.
Nakapahiyom ang babaye sa gipamulong ni Dong Awi. Misamot ang kaanyag niini, sama ni Agua Vendita.
“Magkita ta pirme diri, Awi, kung taob ang dagat sa kaadlawon,” matud ni Day Onlang.
“Ugma gud! taob pa man igka-adlawon,” tingsi ni Dong Awi nga malipayong mipauli.
“Unsay nahitabo?” matud ni Dong Awi, pag-abot niya tungod sa ilang balay apan way mitubag sa iyang mga silingan nga nanagsubo ang mga panagway.
Wa ba kaha kuno namatay ang palahubog niyang tatay. Nagdali siyang misaka sa iyang balay, dihang iyang nadunggan ang danguyngoy sa iyang nanay.
Ug iyang nakita ang usa ka patay, mao ang iyang panagway. (Katapusan)