Lamano nga minaut

Domingo, alas sayis sa buntag nigawas si Minda sa ilang balay kay moadto sa merkado sa ilang barangay. Nakahunahuna siya’g palit og mga utanon. Mag-utan siya para sa paniudto. Wa man sila maanad og pamahaw. Mopainit man lang sila’g pan ug sikwate mabuntag. Mao ni naandan niya sa iyang bana nga si Nato ug bugtong anak nga si Rowena.

Wa lang damha nakit-an niya nga nagdangadanga sa karsada kasugat niya si Patrick. Wa gyud siya’y gana motimbaya ining tawhana. Kay hilasan siya. Makiglamano man gyud si Patrick kada kita nila. Unya hilasan si Minda. Kay nasabot man niya nga minaut lang ning kang Patrick. Pakita lang sa mga tawo nga kunohay mahigalaon siya. Apan sa tago, kusog manglibak ug manaway sa pamilya ni Minda.

Barkada si Patrick kaniadto ni Nato. Dug-ol man ilang mga balay isip managsilingan sa baryo Paracas ning dakbayan. Nagkaaway ilang duha ka pamilya tungod sa kalibakera sa asawa ni Patrick nga si Rita. Unya gikonsenter lang sa bana. Nangabot sila’s barangay hall. Hapit nagkinihaay sa husgado. Unya giuli ilang maayong kabubut-on sa sugyot sa Barangay Kapitan. Naglamanohay sila sulod sa barangay hall. Sukad adto, bisa’g asa magkita, makiglamano gyud si Patrick nila.

Sa simbahan, inig ingon sa pari ‘ipakita ta atong panag-inigsoonay,” molamano gyud si Patrick kun naa sila sa duol. Sa merkado sa baryo, kun mag-abot sila, lamanohon gyud siya ni Patrick. Sa karsada, bisa’g asa lamanohon gyud siya ni Patrick. Ikatawa na lang ni Minda iyang gibating kahilas. Magtuo lang sab ang naulahi nga nalipay si Minda nga gilamano.

Apan kun makalugar siya’g likay, kun may higayon pa, molikay gyud siya ni Patrick. Mopalayo gyud siya aron di malamanohan. Di sab siya magpahalata nga nakakita siya sa naulahi.

Kay si Patrick kada buntag man mag-hike, dihay ka usa naatlan si Minda sa merkado. Lamanohon na gyud unta siya ni Patrick. Apan nagpakaaron-ingnon siyang wa kakita ni Patrick. Nisakay dayon si Minda og traysikol. Iyang gipakyaw aron molarga dayon. Nigunit gyud unta sa traysikol si Patrick.

Karon, may higayon pang ilikay. Kay distansiya pa man ang kasugat sa karsada og 30 metros. Ug sa too ni Minda may likoan nga dalan padulong sa barangay hall. Nisirit si Minda og liko sa tuo. Unya wa sab niya damha nga nahimutang siya taliwala sa lima ka irong nagbugno kay nag-ilog sa usa ka baye nga iro. Aw! Aw! Aw! Growl! Growl! Growl! Grrr! Grrr! Grrr! “Ay ! Ay! Ay!” Natagbaw si Minda og likaylikay. Gitapsingtapsingan iyang mga batiis sa mga tango sa mga iro nga nagbinairay. Nahaiktin-iktin siya. Nangluspad ug gipaningot.

Haskang lisanga ni Minda. Way kabutangan sa iyang kalisang. Ug nakaamgo siya nga mas maayo pa ang hilasan. Kay sa malisang. Nakahukom siya nga sa sunod higayon, di na siya molikay ni Patrick. Makigplastikan na lang siya. (Kataposan)