Naghilak nga Bituon

Gula 95

“Wala na siya,” ni Ethan pa. “Gipadakop ko na siya sa polis. Ikaw nay mohukom kun pasakaan ba nimo siya’g kaso.”

Mipitokpitok ang mga mata ni Jackie. Si Ethan diay ang nagluwas kaniya gikan sa mga kamot ni Cesar Palomo nga may daotan untang buhaton kaniya.

“Suwerte nga nakadungog ko sa imong pagsinggit og pakitabang,” matud ni Ethan. “Maayo gani kay akong nabuntog ang mga bodyguard ni Cesar Palomo. Hapit pud nako mapatay ang demonyong prodyuser sa dihang naabtan ko siya nga andam na unta sa pagpahimulos sa imong pagka-babaye.”

“Salamat sa imong pagluwas nako,” ni Jackie pa. “Kun wala ka pa, hayan nahulog na ako sa mga kamot niadtong salbahis nga prodyuser.”

“Dili ka angay magpasalamat. Katungdanan ko ang pagpanalipod nimo tungod kay ako kang agawon. Gawas pa, dili ko buot nga pasipad-an ka ni bisan kinsang lalaki.”

“E-Ethan...”

“I love you, Jackie. Gimahal ko ikaw kaniadto pa.”

Nakugang si Jackie sa gipadayag ni Ethan. Ingon sa dili siya makatuo sa iyang nadungog. Pero wala siya magdamgo, segurado siya niini. Si Ethan gayod ang militok sa maong mga pulong sa paghigugma ngadto kaniya. -- Sumpayan pa