Kapit-patalim

Gula 2

Samtang naglingkud sa lobby sa hotel si Gelyn, kalit lang dunay mihikap sa iyang abaga gikan sa luyo. Paglingi niya, si Mr. Beltran ang nagpahiyom.

“Tana Gelyn, mag-dinner usa ta,” ni Mr. Beltran pa nga miuna paglakaw paingon sa kan-anan nga anaa ra mahimutang sa silong sa hotel. Nagtimi-timi si Gelyn nga mikaon kay mihari pa kaniya ang kauwaw nga kauban niya si Mr. Beltran.

Diha sa iyang huna-huna ang sunod nga mga panghitabo. Samtang nangaon sila, mabantayan g’yud ni Gelyn nga gisud-ong pag-ayo ni Mr. Beltran ang iyang panagway. Usahay gani magkatagbo ang masi’g nila ka tinan-awan.

“Gikan dinhi, mangadto ta sa unahan nga bar. Gusto ko nga makig-uban nimo karong gabhiona Gelyn,” giingnan ni Mr. Beltran ang dalaga. Wala mokibo si Gelyn. Human sa ilang dinner, hinay sila nga mipasiyo ug mipaingon sa bar.

Miorder si Mr. Beltran og ilang mainum. Brandy ang giorder ni Mr. Beltran ug si Gelyn iyang giorderan og red wine. Gisingki nila ang masi’g nila ka baso sa una nga pagtungab sa ilang mga ilimnon.

Mikisdum ang dagway ni Gelyn dihang ang red wine midapat na sa iyang dila. Mipahiyom nga nagsud-ong kaniya si Mr. Beltran. “Kaya nimo ang red wine Gelyn. Nabag-ohan ka lang,”ni Mr. Beltran pa.

“Nalipay ko Gelyn nga misugot ka nga makigdeyt nako karong gabhiona,” hinay ang tingog ni Mr.Beltran samtang gigunitan niya ug gipig-it ang kamot sa dalaga.Hilaw nga pahiyom ang gibawos ni Gelyn.

“Wala ko’y mahimo Sir. Kinahanglang duna ko’y trabaho aron makatabang pagsulbad sa among kalisud mao nga miuyon ko nga makigdeyt nimo,” wala na motubag si Mr. Beltran.

Misakay sila sa elevator. Gipindot ni Mr. Beltran ang numero 10 sa botton nga nagpasabot nga adto sila sa ika-napulo nga andana. Pagbukas sa elevator, nanggawas sila.

Nag-una gihapon si Mr. Beltran ug mipaingon sa Room 1034. Mingaw ang passage way sa hotel. Pagbukas na sa pultahan, giagbayan si Gelyn ni Mr. Beltran sa pagpasulod.

Daku ang kwarto sa hotel. May duha ka silya ug gamay’ng lamesa kilid sa usa ka gamay’ng refrigerator.Giabli ni Mr. Beltran ang refrigerator.Dunay lainlaing mainom ug mikuha si Mr. Beltran og usa ka canned beer.

Giablehan kini sa manager ug gitunol kang Gelyn. Mikuha usab siya og lain nga maoy iyang giinom. “Mag-happy-happy ta karong gabhiona Gelyn.” (Sumpayan)