Tukso - Gula 6

Duna g’yuy duha ka paresan sa mga babaye ug lalaki nga nasakpan sa akto nga walay mga sapot atol sa kinalit nga ronda sa CAIB sa bar nga gisudlan ni Ador. Nanagtabon sila sa ilang panagway. Gidala sila sa Parian Police Station. Didto na nga nagkita pagbalik ang managhigala nga si Ador ug Willy nga usa diay niadtong paresan nga nasakpang walay sapot sulod sa laing private room.

“Bay Willy, ikaw diay na? Wala ka diay makailis dayon?” wala makatoo si Ador nga ang iyang higala nga suheto na kaayo sa maong dapit naapil nga nasakpan sa CAIB.

Sa imbestigasyon sa kapolisan, nakalingkawas si Ador ug ang iyang partner nga si Red Lips kay gitug-an man g’yud sa mga sakop sa CAIB nga wala nila masakpi ang duha nga walay sapot.

Gitugotan sa kapolisan sila si Ador ug Red Lips nga makabiya sa police station human nga ang CAIB mitataw nga wala sila masakpi nga nagbuhat og law-ay sulod sa private room.

“Mora ko’g naibtan og tunok Red Lips. Pwerteng kulbaa nako apan maayo na lang nga abtik ta nga nakasul-ob dayon sa atong mga sapot,” ni Ador pa ngadto sa dancer.

“Ako sab gikuyawan pag-ayo kay wala ko magdahum nga matultolan nila ang sekreto nga pultahan paingon sa private room. Duna tingali nakatug-an sa CAIB,” matud ni Red Lips.

Namiya sila si Red Lips ug Ador human sila makapananghid sa ilang mga kauban. “Ako na la’y mosulti sa opisina bay nga dili ka maka-duty unya apan bakakan lang nako nga gihilantan ka,” ni Ador pa ngadto sa higala. “Nabitin ko ganina da kay wala man mahuman ang atong kumbati Ador tungod sa pag-abot sa mga sakop sa CAIB,” matud ni Red Lips. Daw nakasabut si Ador nga gusto sa dancer nga ipadayon ang ilang kumbati. “Unya, unsay imong gustong mahitabo?”

 “Kuyog na lang ta sa akong gipuy-ang apartment kay wala man sab ko’y kauban,” tanyag ni Red Lips. Gikan sa Sanciangko, human makuha ni Red Lips ang iyang bag, nag-atang sila’g PUJ paingon sa uptown.

“Naa ra sa Juana Osmeña Street ang akong boarding house, malakaw ra gikan dinhi sa Fuente Osmeña. Hapit usa ta sa botika kay mopalit ta og pangdugang sa imong power,” ni Red Lips pa.

Nangayo ang dancer og P250 kang Ador. Gihunghongan niya ang tindera ug dayon gitunol ang kwarta. Wala madugay mibalik ang tindera nga may dala na nga tambal.

“Imna unya ni kay makatabang kini nga motaas ang imong lahutay,” matud ni Red Lips dayong tunol kang Ador sa tambal. (Sumpayan)