Asa ka man kaniadto?

Dako kaayo ang imong pagpakamenos sa akong kaugalingon taliwala sa kamatuoran nga nahigugma ikaw kanako. Matud mo, ako lang ang imong higugmaon. Dili ikalilong nga maanyag ka kun ang hisgotan ang mga dalaga diha sa atong barangay. Tinuod nga diha sa atong dapit ikaw ang labing maanyag sa tanan, busa garbo ko nga gidawat mo ang akong gugma.

“Ger, isaad ko kanimo nga dili mausab ang akong gugma kanimo,” matud mo. “Buotan ka ug naseguro ko nga diha kanimo ako magmalipayon.”

“Salamat, Min,” tubag ko kanimo. “Para mahimo akong takos sa imong gugma, dublehon ko ang akong paningkamot para kanatong duha.”

Gihagkan ko ikaw ug mibalos usab ikaw. Wala gayod ako magtuo nga mausab ikaw, Minda. Apan, usa ka lalaki ang miabot sa atong barangay hinungdan sa imong pagka-usab. Siya si Ben, guwapo ug hitsurang adunahan.

Kinsa man kaha ang babaye nga dili mahigugma kang Ben nga gawas nga guwapo, kanunay pa kini magsakay og kotse. Apan, nakita ko nga duna kini pagka arogante. Hangtod nga nasayran ko nga nagkahinigugmaay kamong duha.

Gani, dihang nagkasugat kita sa pultahan sa simbahan morag dili na ikaw motagad kanako ug segurado nga tungod kini kang Ben. Maguol man ako apan unsay akong mahimo? Hangtod nga nasayran ko nga ikaw nakigtaban kang Ben.

Tulin nga nanglabay ang mga adlaw sa sanga sa panahon. Tulin usab nga gilimtan ko ang atong kagahapon uban kang Minda. Ug dihang nawala ka sa akong kinabuhi, napuli si Serna usa sa mga nahigugma kanako. Nagkasabot kami nga magminyo aron dunay kahulip kang Minda ug sa dayon mahikalimtan ko ikaw.

Usa ka adlaw human molabay ang pipila ka tuig, kalit ka lang mibutho sa atong barangay, dala ang inyong anak ni Ben. Buot mong manumbalik ang atong kagahapon ug ang atong relasyon, apan nabigo ka kay naa naman si Serna kanako. Mihilak ka ug nagbasol sa imong salikway kanako kaniadto. Nga nahinugon ka sa akong gugma. Buot mong limtan ko si Serna apan dili mahimo kay hapit na moabot ang unang bunga sa among gugma.

Busa, pinaagi sa imong inahan, gisulatan ko ikaw usa ka buntag dihang nagkita kami.

Dear Minda,

Tinuod, gihigugma ko ikaw apan kadtong gugmaha, dugay nang nawala tungod ra usab kanimo. Limtan nalang nato ang atong kagahapon. Dili mahimo nga pulihan ko si Serna kay gihigugma ko siya labaw kang bisan kinsa. Busa, dawata ang kamatuoran nga dili kita para sa usa’g-usa.

Imong higala,

Roger

Human mo madawat ang mubo kong sulat, nagpakahilom ka. Apan, matod sa imong inahan nahadlok siya nga dunay daotang mahitabo kanimo. Sanglit kay kanunay nalang ikaw maghilak. Nagkahugo ang imong lawas ug unsaon na lang ang inyong anak ni Ben. (Kataposan)