“Magsugod ka na karon sa imong trabaho isip akong personal driver,” niya pa.
Gidawat ni Ethan ang yawe nga wala’y tingog-tingog. Unya nanakay dayon sila. Si Ethan sa driver’s seat. Si Jackie sa tupad niini. Gipaandar dayon ni Ethan ang makina sa sakyanan.
“Asa man ta?” Nangutana si Ethan dihang gipadagan na niini ang sakyanan.
“Diretso lang,” ni Jackie. “Adto ta sa New Manila, Quezon City. Tudloan ko lang ka sa agianan. Nasayod kong dili ka pa suheto.”
Wala na motingog si Ethan. Ang pagtagad niini didto ra sa pagmaneho. Wala magdahom si Jackie nga usa diay ka hanas nga driver ang ulitawo.
“Kumosta na ang relasyon ninyo ni Joan?” Nangutana si Jackie dihang misubay na sila sa flyover paingon ngadto sa EDSA. Nagpakaaron-ingnon siyang wala masayod sa nahitabo sa relasyon nila ni Ethan ug Joan.
“Tua na si Joan sa Amerika,” tubag ni Ethan, “gidala sa chatmate niyang kano.”
“Abi ko’g simple lang og pangandoy kadto si Joan? Imported man lagi diay ang hilig?”
“Mao bitaw. Nasayop diay ko sa akong pag-ila kaniya.”
Kahilom. -- Sumpayan pa