Ang sinugdanan anaa sa kataposan - Gula 47

Pero dihang gipaduol na ni Brendan ang nawong niini sa iyang nawong kay buot siyang hagkan, iya na kining gibuyag. Iya na kining gibadlong.

“Ayaw, Brendan,” ni Colleen pa.

“I love you, Colleen,” ni Brendan pa sa hagawhaw nga tingog. “Please...”

“Basta dili ko,” untop nga pamulong ni Colleen.

Nakasabot si Colleen nga nahisagmuyo si Brendan nga iya kining gibalibaran dihang gusto kining mohalok kaniya. Naluoy siya kang Brendan. Apan dili usab mahimong paundayonan niya ang gustong buhaton sa lalaki kaniya.

Dili masugakod sa iyang ginhawaan nga magpahalok siya sa lalaki nga wala niya higugmaa. Hangtod karon wala pa gihapon siya’y pagbati alang kang Brendan. Tinuod nga naangkon na ni Brendan ang iyang kabubut-on, apan si Cody pa gihapon ang tag-iya sa iyang kasingkasing.

Nakasabot siya nga ang kissing is part of the game. Kabahin kini sa kinabuhi sa managtrato. Gani, sa usa ka basahon nga sinulat ni Michael Morgenstern, iya mang nabasahan nga women often think of kissing as a special form of communication.

Mituo siya sa panahom sa maong eksperto. Pero sa sitwasyon nila ni Brendan, dili kini puydeng i-apply. Kini tungod kay wala man lagi siya mahigugma kang Brendan. Gipangilogan siyang naghunahuna nga buot si Brendan mo-kiss kaniya. -- Sumpayan pa