Ang sinugdanan anaa sa kataposan - Gula 46

“Oo, Ate,” mubong tubag ni Colleen.

Dihang nakalakaw na sila si Cody ug Alexa, mi-text siya kang Brendan.

“Lakaw ngari sa ba’y,” nagkanayon ang text ni Colleen ngadto kang Brendan.

Abtik nga misanong si Brendan. Mi-reply dayon kini kaniya.

“Manuroy ta,” gihagad niya si Brendan dihang nahiabot na kini. “Laay kaayo dinhi sa ba’y nga ako rang usa.”

“Si Alexa diay?” Usisa ni Brendan.

“Nanuroy ug si Cody.”

“Aw, kun mao kana, manuroy sab ta.”

Nag-ilis lang og makadiyot si Colleen sa iyang kuwarto ug unya nanglakaw na sila si Brendan.

Miadto sila si Colleen ug Brendan sa Ayala Center Cebu. Sa usa ka outlet sa Jollibee, nangaon sila.

Pagkahuman sa pangaon, nagkasabot silang manan-aw og sine. Pelikulang English ang ilang gitan-aw diin maoy bida si Gwyneth Paltrow, ang paboritong artista sa Hollywood ni Colleen.

Pero wala maka-concentrate si Colleen sa pagpanan-aw nila’g sine. Nabatyagan niya nga dili siya komportable sa panag-uban nila ni Brendan sulod sa sinehan.

Dihang naghinunga-tunga na ang pelikula nga ilang gitan-aw, naigking siya dihang gigunitan ni Brendan ang iyang kamot. Iya untang labnihon ang iyang kamot aron makahiplos kini gikan sa paggunit ni Brendan. Apan wala na lang kini niya buhata kay naikog siya kang Brendan. Tingalig mahiubos kini kaniya nga bisan sa paggunit na lang sa iyang kamot imakuli pa gayod niya niini pagtugot. -- Sumpayan pa