Tukso

Nalipay kaayo si Ador kay nadawat siya sa giaplayan niyang trabaho sa usa ka kompaniya nga tighimo og softdrinks.

Kay naanad lagi sa sweldo didto sa probinsya nga wala gani makaabut og usa ka gatus ka pesos ang adlaw, gidak-an na siya sa sweldo nga P250. Gisaaran siya sa supervisor sa kompaniya nga umentohan ang iyang sweldo kun moabut na siya og unom ka buwan.

Nabag-ohan sa kadaku sa iyang nadawat nga sweldo, giagni ni Ador ang iyang amigo nga si Willy nga manulod sila’g sayaw nga gitawag sa uban og “vitamins” sa mga mata, kanang dunay mga babaye nga magpakita sa pribadong parte sa ilang lawas.

“Dugay na ko nga nangandoy Bay Willy nga makakita nianang maong talan-awon. Ang mga amigo nako sa probinsya mag-iyahay lang og sugilon nga nindot kuno kaayo mga pasundayag diha sa mga bar,” matud ni Ador.

“Walay problema bay Ador basta ikaw lang ang mobangka kay gamay ra ko’g nahabilin sa akong sweldo karon. Adto unta tika dad-on sa Sanciangko’s Wildflower pero nanirado na man. Maayo unta didto bay kay bongga kaayo ang pasundayag,” ni Willy pa.

Nanglakaw dayon ang magbarkada human sila nakakobra sa ilang sweldo. Nanulod sila sa usa ka imnanan diha sa downtown area ug maoy misugat sa panan-aw sa magbarkada ang babaye nga nagsayaw ibabaw sa stage. Naka two piece lang ang dancer.

Sanglit first time pa nga si Ador nakakita niining maong talan-awon, daw naglimbawot ang iyang balhibo. Sagol kalipay ug kahinam ang iyang gibati. Wala siya’y pupamilok nga misud-ong sa dancer nga nakabantay usab kaniya nga nagsigi og tutok sa stage.

Wala diay makabantay si Ador nga gisinyasan ni Willy ang dancer nga ipaduol siya. Nanaug ang babaye gikan sa stage ug giduol si Ador nga diha maglingkod sa atubangan sa stage. Nahapalingi si Ador sa iyang higala kay gisayaw-sayawan siya sa dancer ug usahay ibag-id kaniya ang iyang atubangan.

“Fight Bay! Ayaw palupig!” ni Willy pa ngadto sa iyang higala. Naninggit ang ubang customers kay nakabantay nga nagbinayot si Ador. Milingkod ang dancer sa paa ni Ador ug gikuha ang iyang kamot aron makagakus kini sa iyang hawak.

“Mobalik ko nimo karon human sa akong sayaw ha?” giingnan sa dancer si Ador. Mibalik ang dancer didto sa stage ug mipadayon sa pagsayaw. “Ayaw pagbinayot bay Ador, sukol g’yud,” matud ni Willy.

Taud-taud, gituman g’yud sa dancer ang iyang giingon nga mobalik. Mitupad dayon kini kang Ador. Daw wala mahimutang si Ador apan nahinumdom siya sa giingon sa iyang higala nga dili magbinayot. (Sumpayan)