Kanunay nang mamisita si Brendan sa balay nilang Colleen. May mga higayon nga mag-abot sila si Brendan ug Cody sa higayon nga mamisita usab ang naulahi kang Alexa.
Dili na kaayo sakitan si Colleen nga magtan-aw nila ni Cody ug Alexa nga malipayon. Ilabi na gayod kun mamisita usab kaniya si Brendan nga anaa pud si Cody. Kun paraygon kaayo si Alexa ngadto kang Cody, gihimo usab niya kini ngadto kang Brendan.
Ang iyang tumong mao ang pagpasuya kang Cody. Gusto siyang magselos kini sa relasyon nila ni Brendan.
Apan naglagot na hinuon si Colleen sa resulta sa iyang gihimo. Ingon sa wala maepektohi si Cody sa gihimo niyang pagpasuya ngadto niini. Wala kaha kini makasabot sa iyang gihimo? O wala na kini concern kun unsay iyang pagabuhaton. Tungod kay ang kalibotan niini atua man motuyok kang Alexa. “Ingon sa in love ka na kaayo karon,” nagkanayon si Cody usa ka higayon niana nga nagkasulti sila.
Padulong manuroy sila si Alexa ug Cody. Si Alexa nag-ilis pa sa kuwarto niini mao nga nakahigayon si Cody sa pagpakigsulti kaniya.
“Nganong nakasulti ka man niana?” sukit ni Colleen sa boyfriend sa iyang maguwang.
“Tungod kay nakita kong malipayon ka sa relasyon ninyo ni Brendan,” ni Cody nga nagtingsi. -- Sumpayan pa