One-sided nga relasyon

Nibagting ang telepono sa opisina ni Atty. Eddie Datura samtang dunay gitrabaho sa computer ang abogado. Nilingi siya ni Fe iyang kapikas nga mao ray iyang sekretarya nga naglingkod dapit sa iyang too. Naa sa lamesa ni Fe ang telepono.

 “Tubaga sa” ni Eddie nga nilili sa iyang relo de pulso. Hapit na alas otso. Nagdali siya’g human ining motion iyang gi-encode kay ihapit niya’g file sa laing husgado sa di pa siya motambong sa bista nga na-schedule rong buntaga. Iyang sekretarya igo ra mang manghapnig sa mga folder ug mga papeles, unya tubag sa telepono. Si Eddie ra man gihapon ang mag-type sa mga dokumento. “Hello” ni Fe. Nituyok ang kalimutaw. “Imong ig-agaw ang nitawag” ni Fe ngadto’s iyang bana. Nitunol sa telepono. Nimog-ot. Nasayod dayon si Eddie kun kinsang ig-agawa ang nitawag.

Giundangan ni Eddie iyang gitrabaho. Gidawat ang telepono. “Hello. Ikaw diay ni agaw Charlie? Naa kay lima ka demand letter nga ipahimo? Para sa lima ka tseke nga niuntol?” ni Eddie nga naggunit sa telepono. Nilingi sa kapikas. Nangyamiid si Fe. Nibudlot ang simod.

Di lang kay kalima lang ka higayon nga nagpahimo og demand letter ni si Charlie. Magbilin og papeles. Dili magbilin og kuwarta. Sugoon pa si Eddie, mao pay pagastohon para stamps sa suwat ug sa return card. Hagoon pa. Pagastohon pa. Wa lay reklamo ang buotang ig-agaw. Apan ang kapikas magbagolbol. Gibati na sab hinoon si Eddie og kapikal sa ig-agaw.

Milyonaryo iyang ig-agaw. Minilyon ang kita kada buwan. kay ahente og pisa sa mga sakyanan. Libut sa Pilipinas ang negosyo. Luzon-Visayas-Mindanao. Sa kada kita nila kun piyesta sa ilang lungsod sa Lacaud, maoy kanunay panghambog sa iyang ig-agaw. Katuhoan man. Tulo na ka buok ilang sakyanan. Puro XUV. May mga mahalon nga mga pick-up mga service sa dakong tindahan sa iyang kapikas sa poblasyon. Sobra gatos iyang fighting cocks nga gibuhi. Duol milyon ang maintenance sa mga manok matag bulan. Apan ang maintenance sa pamilya, (may tulo siya ka anak) magbagolbol kun moabot og singkwenta mil. Tihik gyud hinoong tawhana. Ang nakapatihik kay himabaye. Dunay babaye sa kada isla nga masuroyan. Way kalibutan ang kapikas. Gipili man sab ang kapikas nga way libog.

Suod gyud hinoon silang pagka-ig-agaw. Kay gawas nga katalirungan sila, barkada sila gikan sa hayskul ug kolehiyo. Pareho silang hilig og musika. Mugunit silag instrumento. Duna silay combo kaniadto sa ulitawo pa. Apan sa pag-iyahay nag pangita sa swerte sa kinabuhi nagkabulag na sila. Labi na nga dipamilya na sila.

“Duna lang koy ihangyo nimo gaw. Duol una og laing abogado nga dili nimo paryente. Unya pangutan-a kun pilay bayad sa serbisyo nga imong ipabuhat nako. Dayon kun masayud ka na, balik nako. Unya katunga lang ihatag nako. Kontento na ko ana. Kay maikog ko’s akong manghod nga si Jimmy. Duna siya’y problema sa iyang yuta nga may squatter. Nangunsulta nako. Kada konsulta, tagaan kog dos mil. Unya dihang nipasaka na ko’g kaso, imbis bayente mil ray akong gipangayo nga acceptance fee, gidoble niya. Manghod nako, gaw. Igsoon. Ikaw ig-agaw lang, nagpalibre pa. Milyonaryo pa gyud. Patilawa sab kog gamay sa tipik anang minilyon nimo” ni Eddie. Gihugtan og gunit ang telepono. Sakit gyud na sa Pilipino ang dili dayon kaprangka.

“Akong tambag nimo gaw, kanang mga tseke nga minus sa siyen mil pesos, kalimti na lang nas buot. Kay mas dako pa kag gastohon sa kaso kay sa kantidad. Ang dos sentos mil pesos nga tseke, mao na lay kasohi. At least, di kaayo ka maalkanse sa gasto. Kay sa ESTAFA o BP 22 nga kaso, singkwenta mil akong acceptance fee” dugang ni Eddie. “Motawag lang unya ko’g balik, gaw” sa pikas linya.

Nakapahiyom si Fe pagdawat sa telepono gikan sa iyang kapikas. “Dapat sab nang kasabot siya nga wa na ka malipay nga sugoon lang, pagastohon pa. Sulogoon gani nga sogoon swelduhan man, kargador sa pier o merkado, suholan man gani. Abogado na hinoon, dili. Kadakong balisong. One-sided ra kaayo nang inyong relasyon. Iya lang pabor iyang gihunahuna” ni Fe. Nakapanglingo si Eddie. Ug nipadayon sa iyang gitrabaho sa computer. (Kataposan) (Sa gusto’g libreng kunsulta, dad-a ning pahina sa opisina sa tagsulat. Sa Sabado sa buntag)