Gula 84
Gawas pa, ingon sa na-turn off na siya kang Julio karon nga iyang nasayran nga ubos diay kaayo ang pagtan-aw niini nilang mga artista. Natandog ug natumban ni Julio ang garbo sa iyang pagka babaye.
Dihang nakahigayon, gipaak ni Jackie ang wait ni Julio. Nakasinggit kini sa kasakit ug nakabuhi siya gikan sa paggakos niini. Tungod sa gibati niyang kalagot, iyang gitindakan ang dapit sa bilahan ni Julio. Mitikuskos ang lalaki sa kasakit.
“Hayop ka!” Nagpaminti si Jackie sa kasuko. “Sukad karon gitapos ko na ang tanan tali kanato!”
Ug midali siya paggawas sa lawak, biniyaan si Julio nga nag-agungoy pa sa kasakit sa pugaran niini nga naigo sa iyang pagpatid.
Migawas dayon siya sa motel. Tayming kaayo nga may nagsingabot nga taxi. Iya kining gipara ug nagpahatod siya ngadto sa townhouse nga iyang gipuy-an sa Laguna.
Nakugang sila si Nang Tinay ug Noy Teryo sa iyang pag-abot. Wala man gud siya magpahibalo kanila nga moabot siya karon gikan sa Sugbo. Nakabantay si Jackie nga ingon sa nahibulong ang duha ka lagas nga nakamatikod sa pagmug-ot sa iyang nawong samtang midiretso siya sa iyang lawak. -- Sumpayan pa