Gula 41
“Ayaw na ko paantosa, Colleen,” ni Brendan pa. “Please...”“
“Nganong ako man gyud ang imong tuyoon, Brendan?” Sukit ni Colleen. “Dili kay ako ray babaye niining kalibotana.”
“Pero ikaw ray akong gihigugma. Dili ko katudloan ang akong kasingkasing nga magmahal og laing babaye.”
Nahilom si Colleen. Kombinsido siya sa gisulti ni Brendan -- nga dili katudloan ang kasingkasing. Siya bitaw, padayon man siyang nahigugma kang Cody bisan sa kamatuoran nga hinigugma na kini sa iyang maguwang. Gipaningkamotan na niya ang pagpatay sa maong pagbati apan lisod gayod ang paglaksi ni Cody gikan sa luna niini sa iyang kasingkasing.
Mao nga dili siya makabasol kun nganong nagpadayon si Brendan sa pagpangulitawo kaniya bisan makadaghan na niya kini balibari. Nasuta niya nga tinud-anay ang katuyoan ni Brendan kaniya
Sa hilom namatikdan ni Colleen nga inanay nga gituhop sa kaluoy ang iyang kasingkasing ngadto kang Brendan.
“Tingali sa sunod natong panagkita,” ni Colleen pa. “Masayran mo na ang akong tubag.”
Gihukman ni Colleen nga sugton si Brendan bisan wala siya mahigugma sa maong lalaki. Nakab-ot niya ang maong desisyon sa tinguha nga dili siya masakitan pag-ayo nga magsud-ong sa malipayong panagrelasyon nila ni Cody ug Alexa. -- Sumpayan pa