Ang sinugdanan anaa sa kataposan

Gula 40

Misantop sa hunahuna ni Colleen nga kun miagpas pa si Brendan kanila sa pagpangaligo’g dagat didto sa Dalaguete, hayan dili mahitabo ang iyang pagpinutong nga diriyot mosangko sa iyang pagka-disgrasya. At least may kauban siya nga ikasultisulti ug malikayan ang kalaay. At any rate, dili siya mag-inusara.

Gibati na man gud ni Colleen ang kahadlok sa nahitabo kaniya kagahapon. Gipangilogan siyang naghunahuna sa maong hitabo. Kun simbako namatay pa siya tungod sa pagkalumos, pagkadako niyang alkanse.

Karon pa siya makaamgo nga sayop ang iyang gibuhat. Wala kini niya mahunahuna kagahapon tungod kay ang iyang kaisipan gisanapan sa tumang pangabubho ug kaputong. Ingon sa nawad-an siya sa maayong pangartiyo kagahapon.

“May chance na ba ang akong gugma, Colleen?” Misukit si Brendan dihang naghinunga-tunga na ang ilang pagpangaon.

Wala motingog si Colleen. Nasayod na siyang daan nga mao gayod kini ang sangkoan sa panagsulti nila ni Brendan. Mosukna gayod ang ulitawo mahitungod sa gugmang gihalad niini kaniya. Mao kini ang kanunay mahitabo sa ilang panagsulti. Mao man gani nga usahay molikay na siya sa pagpakigsulti kang Brendan kay dili na siya buot nga magpunay sila’g hisgot bahin sa gugma. -- Sumpayan pa