Tungod sa kalapoy sa lawas sa pagsinayaw og belly dancing ganinang buntag hangtud sa hapon ni Doña Katrian Damna, aron mawa ang fats sa iyang lawas ug malig-on ang iyang kabukogan kanunay, kay 70 anyos na raba kuno siya, mikuha siya'g home service, nga usa ka buta nga masahista.
Sud sa iyang kwarto, gihubo niya iyang sinina. Wa siya mauwaw nga nag-bra ug panty na lang siya nga miubo sa humol-humol niyang kama. Kay lagi buta kuno iyang masahista.
Misugod na ang buta sa pagdihog og lotion sa iyang tangkugo, sa iyang mga abaga, sa buko-buko ug lahus na sa may spinal column. Gisundan kini sa buta sa pagpinol-pinol sa iyang mga kaunoran. Gibati niya ang kahayahay'ng hilabihan. Nanghuy-ab siya. Giduka. Gipalong nalang niya'ng lamp shade. Buta bitaw kuno ning tawhana. Di moreklamo'g ngitngit. Gipasagdan na lang niyang buta nga padayong nagmasahe sa iyang lawas.
Tungod sa maong masahe, nindot ang iyang mga damgo. Usa kuno siya ka dalaga nga seksi kaayo. Perfect ang vital statistics. Nagtamak-tamak sa puting mga balas sa baybayon sa Boracay.
Nagsul-ob sa two piece bikini. Dihay nakig-ila-ila niya nga lalaki. Ug nakigsuod pod dayon siya kay gwapo lagi nawong morag si Fredrick F. Gelbolingo. Mihayang ra pod siya nga gipatungan sa katre. Mipiyong nalang siya tungod sa kasilaw sa adlaw.
Ug sa iyang pagbukha'g balik usab sa iyang mata. Ngitngit na sab ang palibot. Nabatyagan niyang may mikumot-kumot sa iyang dughan. Gipasiga niya'g balik ang lampshade. Nakita niya nga wala na siya'y bra. Nagpatong kaniya ang masahista nga buta, naghukas na.
"Butangi! butakal man diay ning butaha, peste!" kalit niyang gi-judo ang buta ug nahulog sa katre.
"Gabaan ka gani nakong butaha ka, tiguwang na baya ko!" ni Doña Karian Damna, nga daling mitapis sa habol sa iyang lawas.
"A, gabaan ka usab gani nako, na. Buta na, gi-judo mo pa!" sa buta nga nagpangapkap ug kagunitan aron makabarog.
"Butakal man diay kang butaha ka! get out! layas!" ni Doña Katrian Damna. Gisinghagan ug gipatiran ang buta. Ug nalukapa.
La, pagmata, giurom ka!' matud sa mga dalaga'ng apo ni Doña Katrian Damna.
"Asang buta nga butakal'ng dako! asa?" ni Doña Katrian Damna, nga mibangon.
"Unsay buta..? Na, nagdamgo nuon ka'g di maayo. Ay gani'g palabi anang imong belly dancing, La, nga hapon na ka mouli gikan pa's buntag," matud sa usa ka apo ni Doña Katrian Damna. Ug gipainom siya'g tubig. (Katapusan)