Naghilak nga Bituon - Gula 82

Wala motingog si Julio samtang naglingkod sa ngilit sa kama. Gikab-ot sa lalaki ang iyang kamot ug gikabig siya niini pagpaduol. Sa dihang mihana na paggakos si Julio kaniya, milugnot siya aron paglingkawas sa mga kamot sa lalaki. Misibog siya’g diyotay.

“J-Julio, please,” naalerto si Jackie sa gipakitang lihok sa lalaki. “Tingalig nalimot ka nga lalaki ka og babaye ako. Dili ka angay mopakita’g lihok nga ingon niana. Or else, magduda ko nga may daotan kang tuyo nako ilabi na nga nia kita sa usa ka pribadong lawak.”

“Ug unsa may daotan niana?” May pagkapilyo ang pahiyom nga miaslay sa mga ngabil sa lalaki. Managhigugmaay man kita, dili ba?”

Misibog na usab si Jackie ug mipaingon sa pultahan. Apan midali pag-agpas si Julio kaniya.

“Asa ka?” Gigunitan ni Julio ang iyang abaga.

“Manggawas na ta dinhi,” ni Jackie pa. ‘Dili ko hungog, Julio. Nasayod ko kun unsay naa sa imong hunahuna karon.

Misamot kapilyo ang pahiyom sa ulitawong kongresista.

“Dili sab ko hungog, Jackie,” ni Julio pa. “Wala koy salig ninyong mga artista. Gusto lang kong maneguro nga ako gyud ang nakauna nimo sa dili ko pa ikaw pangasaw-on.”

“Ingon ba diay niana kamubo ang imong pagtan-aw namong mga artista? Ug sa akong pagka-babaye?” -- Sumpayan pa