Ang sinugdanan anaa sa kataposan - Gula 39
Igo lang gihatod sila si Alexa ug Colleen ngadto sa Banawa sa multicab nga ilang gisakyan. Wala na gani mokanaog si Cody. Giingnan lang niini si Alexa nga mo-text lang kini sa dalaga.
Midiretso si Colleen sa iyang lawak. Nagkuha’g ilisan ug nanghimasaw sa banyo. Niining tungora, dili na kaayo siya luya. Pero gusto niyang makapahulay maong gipaspasan niya ang pagkaligo.
Nagkasabot sila si Colleen ug Alexa nga dili nalang sultihan ang ilang mga ginikanan sa nahitabo kaniya.
Lunes sa udto. Giatangan si Colleen ni Brendan sa main lobby sa unibersidad nga iyang gitunghaan. Sa iyang paggawas, misugat dayon ang ulitawo kaniya.
Gidapit siya ni Brendan og paniudto. Mobalibad unta siya apan namugos gyud ang ulitawo. Iya na lang kining gipaundayonan aron dili kini mahiubos kaniya.
Sa outlet sa Chowking sa Colon sila nangaon.
“Diin man diay mo gahapon?” sukit ni Brendan samtang nagpadayon na sila sa pagpangaon.
“Didto mi sa Dalaguete,” tubag ni Colleen. “Mikuyog ko nilang Ate Alexa nga nangaligo og dagat.
Naghilom na si Colleen. Wala niya sultihi si Brendan nga diriyot siya madisgrasya kagahapon sa ilang pagpangaligo.
“Kun gitug-anan pa ko nimo kun diin mo gahapon,” ni Brendan pa, “moagpas unta ko ninyo. Pero wa na man ka mo-reply sa ikaduha nakong pag-text.”
“Nag-lowbat ko,” maoy tubag. -- Sumpayan pa
- Latest
- Trending
