Gula 2
Nakasabot ang taxi driver nga ang lima ka babaye nga iyang sakay gikan sa pantalan mga bag-ong recruits alang sa kasa dihang giingnan siya nga adto sila paingon sa Green House diha sa dalan Junquera.
Nadungog na man gud, ilabi na sa mga drayber og taksi nga ang Green House usa ka kasa. Wala motubay ang recruiter sa pangutana sa drayber kun bag-o na ba usab niya nga rekrut ang maong mga babaye.
Nahiabot ra sila sa atubangan sa Green House. Nanganaug dayon ang mga babaye nga kauban ni Laura. “Mo-off ko’g sayo unya ha, kinsa’y akong pangitaon diha kay kursonada nako kanang bigot kaayo’g lawas,” matud sa drayber.
“Pangitaa lang si Cardo nga maoy nagmentin sa kasa. Wala ko’y labot sa ilang operation kay ang ako mao ra ang pagsuplay kanila’g mga mamolds,” ni Laura pa nga mitunol og P250 ngadto sa drayber.
Wala dayon molarga si Rodel bisan og gibayran na siya sa plete. Gilingi g’yud niya pag-ayo si Lenie nga maoy giingon niya nga bigot kaayo’g lawas.
“Uy, sayo diay kamo nga midunggo Laura? Lima ra sila?” matud ni Cardo nga misugat kanila sa pultahan. “Alas singko pa diha na kami sa pantalan. Uy yuna, siya diay si Cardo ang tag-iya niining Internet Café nga inyong trabahoan,” matud ni Laura.
Miliraw ang mga mata sa lima ka batan-ong probinsyana. Nakita tuod nila ang karatola nga Cardo’s Internet Café. Sige, sulod kamo. “Kana maoy inyong kwarto, pamili ra kamo diha og inyong double deck,” ni Cardo pa.
Misulod sila si Lenie sa kwarto ug nakita nila nga dunay mga babaye didto nga nangatulog pa. Ang uban kanila nag two-piece lang nga naghigda sa ilang mga double deck.
Unang migawas si Lenie sa kwarto ug mao g’yuy nakit-an niya nga gitunolan ni Cardo si Laura og kwarta. Mipaduol si Lenie kanila ni Cardo ug Laura. “Sige mangaon usa ta kay inighuman, molakaw na ko. Kamo nay bahala dinhi ha?” ni Laura pa.
Sa ilang pagpangaon, nakabantay g’yud si Lenie nga nagsige’g tutok kaniya si Cardo. “Pila nay edad nimo Lenie?” wala g’yud makaagwanta si Cardo. “Bag-o lang ko nga nag-17 adtong miaging buwan,” dali nga tubag sa dalaga.
Human sa ilang pagpangaon, gidala ni Cardo ang mga dalaga sa internet café. “Dinhi ra kamo… tagda lang kun dunay mosulod nga customers,” ni Cardo pa ngadto sa mga dalaga. (Sumpayan)