Ang sinugdanan anaa sa kataposan

Gula 38

MANILA, Philippines - “Si Cody usab ang nagpahigayon og mouth-to-mouth resuscitation kanimo aron ka maulian sa panimuot ug mahabwa ang tubig nga imong nainom,” dugang asoy ni Alexa kaniya.

Mouth-to-mouth resuscitation? Misanting ang mga dalunggan ni Colleen pagkadungog sa maong mga pulong. Nakasabot siya sa buot ipasabot niini. Nagpasabot kini nga gisupsop ni Cody ang iyang baba aron mahabwa ang tanang tubig nga nasulod sa iyang lawas.

May diyotay’ng kalipay nga mialimbukad sa kahiladman ni Colleen sa iyang nasayran. Kun mao, nagkadapatay diay ang mga ngabil nila ni Cody. Gibati na hinuon niya ang kahinugon nga unconscious siya samtang nahitabo kini. Mabatyagan unta niya ang kainit sa mga ngabil ni Cody nga midapat sa iyang mga ngabil atol sa pagpahigayon sa mouth-to-mouth resuscitation.

Apan nahisagmuyo lang usab dayon si Colleen. Misantop sa iyang hunahuna nga dili usab mahitabo nga i-mouth-to-mouth resuscitation siya ni Cody kun wala pa siya mawad-i sa panimuot tungod sa pagkalumos.

Pulos ra gayod kabawo ang iyang nasinati ug naangkon.

Tungod sa nahitabo ni Colleen, wala na ipadayon sa grupo ang pagpangaligo sa dagat. Namauli na lang sila. Namalik na sila sa siyudad. -- Sumpayan pa