Ambisyosa

Gibaliwala ra ni Lenie ang bakho og mga luha nga gipaagas sa iyang inahan nga mipugong g’yud unta kaniya nga dili modayon paglarga paingon sa dakbayan sa Sugbo.

Nabug-os na ang huna-huna ni Lenie nga biyaan ang mingaw nilang baryo sa lungsod nga sakop sa Cagayan de Oro. Nadani g’yud siya sa maayo kaayong manulti nga babaye nga nang-recruit og mga batan-ong babaye sa ilang dapit.

Tulo sila si Lenie nga taga baryo Kaligda’g-bato nga nadani sa recruiter. Kinsa man tuo’y dili madani nga giingnan man sila sa recruiter nga magbantay ra sila og tindahan og P10,000 ang sweldo nila mata’g buwan.

Wala na makapadayon si Lenie sa pagtungha sa high school tungod sa kaapike sa panginabuhi sa iyang mga ginikanan.

“Nindot ba g’yud kaayo ang Cebu City friend?” gipangutana ni Lenie ang recruiter nga nagpaila nga si Laura, kinsa nagpatawag lang og “friend” sa iyang mga narekrut.

“Alegre kaayo ang dakbayan sa Sugbo… dili sama dinhi sa inyo nga pwerteng mingawa ug wala ka g’yoy kaugmaon,” matud sa recruiter dihang mihinay na pagbiya ang barko sa pantalan.

Wala g’yud makatulog si Lenie bisan og naglawig na ang barko paingon sa dakbayan sa Sugbo. Naluoy baya unta siya ni Mama niya Lucing nga pwerteng nakahilak sa iyang pagbiya, apan maoy diha sa iyang huna-huna nga moasinso sa pagpuyo.

Pagkabuntag, midunggo na ang barko nga ilang gisakyan diha sa pantalan. Isig bitbit sila sa ilang mga bag ug gisunod sa mga babaye si Laura nga milakaw paingon sa pultahan sa pantalan.

“Sunda lang ko ninyo ha?” Paspas kaayo si Laura nga milakaw ug gibiyaan ra ang mga batan-ong babaye nga natagbaw gani og lantaw nga dili sila mawala. 

Didto na si Laura mihunong unahan na sa pultahan sa pantalan. “Nag-una ra ko ninyo kay samok kaayo ang ubang gwardya diha kun may kauban ka nga mga batan-ong babaye,” gipasabot ni Laura ang lima ka dalaga.

Misakay sila’g taksi. “Karga ra ming unom Brod?” gipangutana ni Laura ang driver. “Sige ra total, gagmay man kining duha. Pakapini lang unya Ma’am ha?” matud sa taxi driver.

“Ihatud mi sa Green House sa dalan Junquera,” giingnan ni Laura ang driver. “Bag-o ni sila Ma’am?” nangutana ang drayber sa dayon nang padagan sa taxi. (Sumpayan)