Naghilak nga Bituon

Gula 79

“Daghan diay kaayo ang nahitabo samtang wala ko dinhi,” ni Jackie.

“Mao gyud,” ni Gilda pa. Tagdugay ka man gud nga mobakasyon dinhi sa Sugbo.”

“Busy ko sa pag-atiman sa akong showbiz career. Pero karon dili na kaayo hectic ang akong schedule.”

“Kanus-a man mo magminyo si Cong. Julio Dechavez?”

“Wala pa kami maghisgot mahitungod niana. Busy siya sa kongreso. Ako sab, maoy akong priority ang akong showbiz career.”

Maoy pagsulod ni Jackie sa departure area sa Mactan Cebu International Airport sa dihang mibagting ang iyang cellphone. Iya kining gidali pagkuha gikan sa iyang shoulder bag.

Si Cong. Julio Dechavez ang nanawag. Iya kining gitubag.

“Hain ka karon? Naa ka pa sa Cebu?” Nagpusotpusot ang mga pangutana sa boyfriend niyang kongresista.

“Pabalik na ko diha sa Manila,” tubag ni Jackie. “Mga 45 minutes gikan karon molarga na ang ayroplano nga akong sakyan. Dia na ko sa airport. Ngano man diay?”

“Gusto kong magkita ta.”

“Importante?”

“Yes, importante kaayo. Gawas nga gimingaw na ko nimo, may mahinungdanon kitang panagsultihan.” -- Sumpayan pa