Ang sinugdanan anaa sa kataposan

Gula 36

“Si Colleen, tabanga ninyo,” mao nay kataposang tingog -- tingog ni Yana -- nga iyang nabati dayon niyang unlod sa ilawom sa dagat.

Maoy namatngonan ni Colleen nga naghigda na siya sulod sa cottage sa dihang nabalikan siya sa maayong panimuot. Diha sa iyang palibot sila si Cody, Alexa, Katrin, Yana, Rafal ug Jarren. Nagtambayayong sila sa pagtabang kaniya aron maulian sa panimuot.

Nahinumdom na si Colleen sa nahitabo kaniya. Milangoy siya kaganina paingon sa lawod ug nalumos.

“S-salamat sa Dios nga naulian ka na sa panimuot, Sis,” nagkanayon si Alexa nga naghilak, kaha tungod sa kabalaka sa nahitabo kaniya.

Diha si Cody tupad ni Alexa dapit sa iyang ulohan.

Wala motingog si Colleen. Gibati niya ang piog sa kaluya. Gipiyong niya ang iyang mga mata kay ingon sa gibati niya ang kakapoy.

Pagkataudtaod, gibati niya nga may misuhag sa iyang ginhawaan. Unya midigwa siya. Pulos tubig ang iyang gisuka.

“Sige, Colleen,” ni Cody pa. “Isuka ang tanang tubig nga imong nainom.”

Nakahilak si Colleen. Nahimangod siya sa nahitabo kaniya. Hapit gyud siya malumos sa hingpit kun wala pa siya matabang. Kun wala pa siya maluwas, seguradong patay na siya karon. -- Sumpayan pa