Hiniktan nga pagbati

Igo nalang nga nagpaminaw si Sheila Mae sa gipangtokar nga sonata sa usa ka sound system nga manukad sa sud sa ilang plasa. Diha ra man god siya maglaming sa iyang kuwarto, human siya balibari sa iyang amahan.

Mihangyo man god siya sa iyang amahan nga moadto siya sa plasa sa ilang barangay aron motambong sa disco. Apan gipugngan siya sa iyang amahan. Ug giingnan nga dili gayud paadtoon. Bisan pa kun duna siya'y ikauban. Mibahad pa man gani kaniya ang iyang amahan nga duna gyu’y mahitabo kaniya kun magtuman gayud si Sheila Mae sa iyang gusto. Maong mipatuo lang usab siya.

Samtang nagsige’g tokar sa may plasa, misamot usab og rigor ang kahiladman ni Sheila Mae. Naglagot man god kaayo siya sa iyang amahan nga hilabihan na kaayong nakapig-ot kaniya. Dili na gayud kini motugot kun maglakaw-lakaw siya panahon sa kagabhion. Ilabi na gayud sa pagtambong sa mga kalingawan. Sama sa mga disco.

Hinuon dili usab mabasol ni Sheila Mae ang iyang amahan. Siya ra usab maoy sad-an. Nagpatuyang man lang god siya sa gibati niya. Ug nagpada siya sa sulog sa gugma. Sayo man god kaayo siyang nanguyab. Nga bata pa man unta siya kaayo. Wala pa man gani siya makahuman sa hayiskol. Kay second year pa man lang siya.

Gani, nakauyab tuod si Sheila Mae apan pinaagi sa paggamit sa selpon. Magteksanay man lang god siya ug ang lalaking iyang nauyab. Mahadlok man sab mamisita diha sa ilang balay ang mga manguyab kaniya kay hilabihan mang estriktoha sa iyang amahan.

Gipaagi lang sa pagteks ang pagbayloay og mga matam-is nga pulong sa gugma sa duha. Lakip na ang paglig-on sa ilang mga saad ug panumpa. Hapit gani kada oras nga magteksanay gyud sila si Sheila Mae ug ang iyang uyab. Nga nagpuyo ra usab sa kanait nilang barangay.

Tungod lang usab sa selpon nahibaw-an sa amahan ni Sheila Mae ang ilang relasyon ug sa iyang uyab. Danghag man kaayo si Sheila Mae kay bisan asa man lang niya ibutang ang iyang selpon. Wala lang siya masayod nga kanunay diay'ng makabasa ang iyang amahan sa mga gipangteks sa iyang uyab ngadto kaniya. Ug hangtod pa gani sa iyang gipangteks ngadto sa lalake.

Diha usab sa selpon mahibaw-i sa amahan ni Sheila Mae nga may nahitabo na kaniya ug sa iyang uyab. Kay sa pipila god nila ka mga mensahe, mora'g nagsinukmatay naman sila. Mora'g nagbinasolay na hinuon.

Ug tungod sa iyang nahibaw-an nga binuhatan ni Sheila Mae, hilabihang sukoa sa amahan. Giligid gani og latos sa bakos niini si Sheila Mae.Maayo nalang gani, kay gisanta kini sa inahan ni Sheila Me. Maong naundang ang paglatos niini.

Sukad niadto, gipig-otan na pag-ayo si Sheila Mae sa iyang amahan. Gikuhaan kini sa iyang selpon. Ug wala na gyud tugoti nga makaadto og mga kalingawan. Bisan gani kun ang maong kalingawan anha ra sa ilang dapit.

Ug mao na kini ang hinungdan karon sa iyang pagkalaming diha sa sud sa iyang kuwarto. Kay wala naman siya tugoti sa iyang amahan, nga moadto sa plasa, aron motambong sa disco. Nahadlok tingali ang iyang amahan nga magkakita pa unya sila ug ang iyang uyab. (Kataposan)