Dinagmalan

Gula 7

“Reynan?” Nakalitan ug daw naglisud pagtuo si Rosalinda nga tininuod ang pagpangulitawo ni Reynan kaniya.

 “Katabang ra ko ninyo Reynan ug dili kita angay sa usa’g-usa,” matud ni Rosalinda bisan og diha sa iyang kasing-kasing may nagpahipi na nga pagbati ngadto sa ulitawo.

Apan luyo sa iyang pagpatuso-tuso nga wala siya makagusto sa ulitawo, milutaw gayud nga duna siya’y pagbati dihang wala siya motukol nga gigakus na ni Reynan.

Gihagkan siya ni Reynan. “Hibalo ka Rose, tumong nako nga nakig-inom sa akong mga barkada aron may kaisog ako sa pagtug-an kanimo sa akong gibati.”

Wala motubag si Rosalinda, apan taud-taud. “Hinay-hinay usab ko nga nakat-on pagmahal nimo Reynan dihang giatiman ko nimo dihang gidagmalan ko sa akong amahan. Labi na g’yud dihang gipasandig ko nimo sa imong abaga samtang nagsakay ta sa bus paingon dinhi sa siyudad.”

Giukoban ni Reynan ang mga ngabil sa dalaga. Puno sa pagmahal ang ilang mga gakus ug pagparayganay. Nag-agbayay sila si Reynan ug Rosalinda paingon sa kuwarto sa ulitawo. Kaadlawon na nga migawas si Rosalinda gikan sa lawak ni Reynan diin didto gisaw-an nila ang kalibotanong kalipay.

“Unsang orasa nauli si Reynan, Day?” nangutana ang inahan sa ulitawo ngadto kang Rosalinda. “Kaadlawon na Nang ug nakainom.” Wala kaayo motubay si Rosalinda pakigsultihanay sa inahan ni Reynan.

Taud-taud, mibukas ang pultahan sa kuwarto ni Reynan ug migawas ang ulitawo. “Domingo man karon Dong, nganong sayo ka man mibangon,” nangutana ang inahan.

“Mosimba ko Ma ug paubanon nako si Rose,” ni Reynan pa nga nakapahibulong sa iyang inahan. Nanglakaw tuod sila si Reynan ug Rosalinda. Nakahuna-huna si Reynan nga moagi sa Sanciangko diin didto sila nag-inom ug ang iyang mga higala gabii.

“Kanang may karatola nga Sanciangko’s Wildflower, diha kami nag-inom ug ang akong mga higala gabii kay molarga na lagi sa abroad ang tag-iya nga si Sir Wendel,” matud ni Reynan.

Gipahunong kadiyot ni Reynan ang iyang kotse atubangan sa bar. Apan may karatola na sa pultahan nga nagpahibalo nga mosirado na ang Sanciangko’s Wildflower.

Milabay ang pipila ka buwan, mibalik sila si Rosalinda ug Reynan sa ilang barangay sa Barili. Nakurat ang barangay kapitan sa ilang pag-abut.

 “Kap ayaw mi og balibari ha kay usa ka sa kuhaon namo nga sponsor sa among kasal,” ni Reynan pa nga nag-agbay kang Rosalinda. (Kataposan)